काठमाडौँ, साउन ११ गते ।
सुनसरीमा धार्मिक सद्भाव खल्बलिने गरी भएको घटनाबारे छलफल गर्न गृहमन्त्री सुधन गुरुङले सोमबार केन्द्रीय सुरक्षा समितिको बैठक बोलाएका छन्।
सोमबार बिहान गृह मन्त्रालयमा मन्त्रालयका सचिव, नेपाल प्रहरीका महानिरीक्षक (आईजीपी) र सशस्त्र प्रहरी बलका महानिरीक्षकसँग प्रारम्भिक छलफल गरेपछि गृहमन्त्री गुरुङले साँझ केन्द्रीय सुरक्षा समितिको बैठक आह्वान गरेका हुन्।
आइतबार राति भएको झडपका क्रममा सुरक्षाकर्मीले चलाएको गोली लागेर सुनसरीको कप्तानगञ्ज निवासी ओमप्रकाश मेहताको मृत्यु भएको थियो।
गृह मन्त्रालयकी सूचना अधिकारी तथा उपसचिव रमा आचार्य सुवेदीका अनुसार बैठकमा घटनाको समग्र समीक्षा गर्दै भविष्यमा यस्ता घटना दोहोरिन नदिन अपनाउनुपर्ने दीर्घकालीन उपायबारे छलफल गरिएको छ।
यसैबीच, घटनाको छानबिन गर्न गृह मन्त्रालयले सहसचिवको नेतृत्वमा पाँच सदस्यीय छानबिन समिति गठन गरेको छ। उपसचिव सुवेदीका अनुसार समितिले घटनाको वस्तुगत अध्ययन गरी आवश्यक सुझावसहित प्रतिवेदन पेश गर्नेछ।
Discussion about this post