बाँके असार ४ गते ।
निरन्तर बर्षाका कारण राप्ती नदीमा पानीको सतह बढ्दै गएर नदी वरिपरिका गाउँबस्तीहरु डुबानको उच्च जोखिममा परेपछि बाँकेका उच्च अधिकारीले बिहिबार विभिन्न स्थानमा नदीको निरिक्षण गरेका छन् ।
विपद व्यवस्थापन समितिका अध्यक्ष तथा बाँके जिल्लाका प्रमुख जिल्ला अधिकारी शिवराम गेलालको नेतृत्वमा जिल्लाका सबै सुरक्षा निकायका प्रमुखहरु तथा रेडक्रस सोसाईटीसहितको टोलीले कुसुुम र अगैयामा पुगेर अवस्था बारे जानकारी लिएको छ ।
सो टोलीले राप्तीसोनारी गाउँ पालिकाको कुसुममा राप्ती नदीमा राखिएको जलस्तर मापन केन्द्र र अगैयास्थित सिक्टा सिचाईको मुख्य बाँधको निरिक्षण गरेर पानीको सतह बढ्दै गएको पाएपछि जिल्ला भरि हाई अलर्ट जारी गरेको प्रमुख जिल्ला अधिकारी गेलालले बताउनुभयो ।
उहाँले कुसुमको जलमापन केन्द्रलाई सजक र सतर्क रही पानीले खतराको विन्दु पार गरेर डुबान पार्ने संकेत गरे लगत्तै सबैलार्ई खबर गर्न निर्देशन दिर्ईएको बताउनुभयो ।
बुधवार विहान राप्ती नदीले खतराको संकेत पार गरेका थियो । तर, पछि पानीको सतह घट्दै गएको थियो ।
विहिबार विहानदेखि फेरी निरन्तर नदीको सतह बढी रहेको मापन केन्द्रले जनाएको छ । बाढीको अत्याधिक जोखिममा रहेको राप्तीसोनारी गाउँपालिकाको पुर्व तयारी र हालको अवस्थाका बारेमा छलफल गर्न विहिबार अगैयामा एक बैठकको आयोजना गरियो ।
सो बैैठकमा बाँकेका प्रमुख जिल्ला अधिकारी गेलाल, प्रहरी प्रमुख एसपी ओम राना, शसस्त्र प्रहरीका एसपीहरु अशोक बम र प्रकाश सुुवेदी, राष्टिय अनुसन्धानका एसपी, राप्तीसोनारी गाउँपालिकाका अध्यक्ष लाहुराम थारु, वडा अध्यक्षहरु, नेपाल रेडक्रस सोसाइटी बाँकेका अध्यक्ष गोवर्धनसिंह सम्झना, वि ग्रुप, बेस र उद्योग बाणिज्य संघ लगायतका सहयोगी संस्थाहरु, विपद व्यवस्थापन समितिका सुचना अधिकृत रुपन ज्ञवाली र पत्रकारको सहभागिता रहेको थियो ।
सो अवसरमा बाढीबाट जोगिने तयारी र हालको अवस्थाका बारेमा विस्तृत रुपमा छलफल गरिएको थियो । बाढी र डुबानबाट सर्वसाधारणलाई जोगाउन सेना, शसस्त्र प्रहरी र जनपथ प्रहरीलाई तालिम दिएर जोखिमका क्षेत्रमा खटाईएको बाँकेका एसपी रानाले बताउनुभयो । उहाँले जिल्लाका सबै सुरक्षा निकाय तयारी अवस्थामा रहेको पनि बताउनुभयो ।
Discussion about this post