बाँके असार १७ गते ।
नेपाल विद्युत प्राधिकरणको लापरवाहीका कारण नेपालगन्ज उपमहानगरपालिका–१७ नदइगाउँका डेढ सय बढी किसान तनावमा परेका छन् । तीन साता अघि आएको हावाहुरीले विद्युतको पोल ढालेपछि मर्मतको लागि गएको प्राधिकरणको टोलीले हाइटेन्सन लाइन जोडेपनि कृषि लाइन काटिदिएको स्थानीयको गुनासो छ ।
स्थानीय शेरबहादुर खटिकको जग्गाबाट उक्त लाइन विस्तार भएको थियो । खटिकले आफ्नो जग्गाबाट लाइन नदिने बताएपछि स्थानीयबीच विवाद बढेको थियो ।
स्थानीयका अनुसार बीस वर्षदेखि नै त्यही लाइनबाट आफुहरुले वत्ति लगेको बताउँछन् । लाइन काट्नुको कारणबारे वडा कार्यालयले विद्युत प्राधिकरणसँग पनि जवाफ माग गरेको छ ।
मनोमानी तरिकाबाट प्राधिकरणले लाइन काटेको भन्दै वडाअध्यक्ष अजय पाठक पनि प्राधिकरणप्रति रुष्ट हुनुभएको छ ।
विद्युत प्राधिकरणले भने स्थानीयबीचको विवादले लाइन नजोडिएको बताएको दावी गरेको छ ।
प्राधिकरणका नेपालगन्ज प्रमुख लाखन लाला मलिकले लाइन जोड्न आफुहरु तयार भएपनि स्थानीयबीचको विवाद मिल्नु पर्ने बताउनुहुन्छ ।
उक्त कृषि लाइनबाट पन्ध्रवटा कृषि मिटर संचालनमा थिए । अहिले लाइन नहुँदा डेढ सयबढी किसान सिंचाइँ सुविधाबाट बञ्चित भएका छन् ।
Discussion about this post