खोजखबर संवाददाता
बाँके भदौ ३१ गते । बाँकेमा डेंगु संक्रमितको संख्या ४० पुगेको छ । बाँके सहित विभिन्न जिल्लाबाट उपचारकालागि भेरी अस्पताल आएकाहरुमा समेत डेंगु देखिएको छ । बाँकेका ९ र बाह्य जिल्लाका ३१ जना डेंगु संक्रमितहरुको अहिले बाँकेका विभिन्न अस्पतालमा उपचार भईरहेको छ ।
भेरी अस्पताल नेपालगन्ज, शिक्षण अस्पताल कोहलपुर र नेपालगन्जमा डेंगु संक्रमितको उपचार भैरहेको जिल्ला स्वास्थ्य कार्यालय बाँकेले जनाएको छ ।
भेरी अस्पताल नेपालगन्जमा १७ जना डेंगुका बिरामी फेला परेका थिए । जसमध्ये ६ जना अहिले पनि उपचारमा रहेको भेरी अस्पतालका मेडिकल सुपरिटेन्डेन्ट रुपानन्द अधिकारीले जानकारी दिएका छन् । यस्तै कोहलपुर मेडिकल कलेजमा पनि २२ जना मध्ये अहिले २ जना मात्र उपचार गराई रहेका छन । २० जना उपचारपछि घर फर्किसकेका छन । बाँकेका सरकारी र निजी गरेर विभिन्न अस्पतालमा डेंगुका रोगी उपचारका लागि आउने क्रममा वढेको डा.रुपानन्द अधिकारीले बताए ।
जिल्लाका साथै बर्दिया, कैलाली, रुकुम दाङ्ग र सुर्खेतबाट डेंगुका बिरामी नेपालगन्ज र कोलपुरका अस्पतालमा उपचारका लागि आइरहेका छन्। डेंगु संक्रमितमध्ये अधिकांश बिरामी जिल्ला बाहिरबाट आउने गरेका छन ।
अधिकारीले डेंगु उपचारका तत्काल कुनै समस्या नभएको बताए । उनले अस्पतालले उपचारको काम मात्र गर्ने भएकाले स्थानीय तहहरुले त्यसविरुद्ध जनचेतना जगाउने, नियन्त्रणका लागि अन्य उपायहरु अवलम्वन गर्नुपर्ने धारणा राखे । उनले डेंगु नियन्त्रणकालागि घरबाट नै सरसफाईमा ध्यान दिनु पर्ने भएकाले सबैलाई सचेत हुन समेत आग्रह गरेका छन ।
बाँकेका ८ स्थानीय तह मध्ये जानकी गाउँपालिका र डुडुवा गाउँपालिकामा लामखुट्टेको लार्भा नष्ट गर्ने अभियान चलाइएको छ ।
Discussion about this post