पर्सा असोज १४ गते ।
वीरगन्जकी मुस्कान खातुनलाई एसिड प्रहार गर्ने फरार कसुरदारलाई पर्सा प्रहरीले पुनः पक्राउ गरेको छ ।
कोरोनाको पहिलो लहरका समयमा पछि फेरि बाल सुधार गृहमा कैद भुक्तान गर्ने गरी राख्न अदालतले दिएको आदेश विपरित कसूरदार समसाद मियाँ फरार भएपछि बुधबार भने उनी पुनः पक्राउ परेका हुन्।
कसूरदार मियाँ वीरगन्ज महानगरपालिका वडा नम्बर २ छपकैया स्थित आफ्नै घर नजिकको ईदगाह चोकबाट पुनः पक्राउ परेको पर्सा प्रहरीले जनाएको छ। वीरगन्जस्थित बाल सुधारगृहमा कैद भुक्तान गर्दै आएका कसूरदार मियाँलाई कोभिड–१९ को पहिलो लहरमा पर्सा जिल्ला अदालतकै आदेशबाट २०७६ साल चैत ११ गते संरक्षकको जिम्मामा छोड्नु भनिएको थियो।
अदालतको आदेश अनुसार ०७६ चैत १२ गते नै पछि पुनः बुझाउने शर्तमा उनलाई संरक्षकको जिम्मा लगाइयो। तर पर्सा जिल्ला अदालतकै २०७७ फागुन २६ गतेको आदेश यता उनी फरार भए।
५ महिना १६ दिन कैद भुक्तान गर्ने गरी १ वर्ष कैद सजाय भएपछि त्यो आदेश कार्यान्वयन गर्ने सिलसिलामा फरार मियाँलाई बुधबार पुनः नियन्त्रणमा लिएको पर्साका प्रहरी नायव उपरीक्षक ओम प्रकाश खनालले बताए।
कसूरदार मियाँले अर्का साथीसँग मिली २०७६ भदौ २० गते बिहान ६ बजेर २० मिनेटमा खातुनलाई वीरगन्ज ४ गणेशमान चोक स्थित सार्वजनिक सडकमा अनुहारमा एसिड प्रहार गरेको पहिले नै पुष्टी भइसकेको थियो।
त्यो समयमा खातुन १५ वर्षकी थिइन्। साविक रौतहट नरकटिया गाविस २ हालको परोहा गाउँपालिका ७ का मियाँका परिवार सहित बसाई सराई गरी वीरगन्ज–२ छपकैयामा बस्दै आएको समयमा उनले त्यो घटना घटाएका थिए।
सो समयमा उनी पनि १७ वर्षका मात्र रहेकोले ज्यान मार्ने उद्योग तथा तेजाब प्रहार गरी अनुहार कुरुप पार्ने सम्बन्धी कसुरमा पर्सा जिल्ला अदालतले दोषी ठहर पश्चात बाल सुधार गृहमा राख्न आदेश दिएको थियो।
Discussion about this post