मुगु कार्तिक ३० गते ।
‘रातको समयमा आगो लाग्यो । साँघुरो बाटो, जोडिएका घर । दमकल छैन, पानीको अभाव । रातभर जलेका घर हेर्नु र रोइकराइ गर्नु पीडितको बाध्यता बन्यो ।
’मुगुका पत्रकार प्रकाश देवकोटाले सोमबार राति गमगढी बजारमा लागेको भीषण आगलागीको दृश्य यसरी बताए ।‘मध्यरातमा आगलागी सुरु भएको हो ।
जोडिएका घरहरु हुनाले आगो चाँडै फैलियो’, उनले भने, ‘जिल्लामा अहिलेसम्म दमकल छैन ।आगलागी भएको बजारमा माथि पानी नै पानीको खानी रहेको रारा ताल छ, तल कर्णाली नदी बगेको छ, तर जलेका घर निभाउन पानी भएन ।
’तोकिएको समयमा खानेपानी आउने तर अरु कार्यका लागि गमगढी बजारमा पानीको निकै अभाव रहेको पत्रकार देवकोटाले बताए ।‘आपतकालीन उद्धार तथा विपदको सामना गर्नका लागि आवश्यक व्यवस्था नगरिनु ठूलो कमजोरी बन्यो’, पत्रकार देवकोटाले भने, ‘स्थानीय सरकारले पनि पानीको व्यवस्था तथा दमक ल्याउनका लागि अहिलेसम्म प्रभावकारी पहल गरेको देखिँदैन ।’
पत्रकार देवकोटाका अनुसार तल्लो मुगु बजारको १० प्रतिशत क्षेत्रमा आगोले क्षति गरेको छ ।‘प्रभावितहरु स्थानीय स्कुल तथा कुना च्यापेर बस्नु भएको छ । जलेको घर हेर्नुको विकल्प रहेन । सेना, प्रहरी तथा स्थानीय बासिन्दाले उपलब्ध सीमित पानी तथा माटो प्रयोग गरे आगो निभाउने प्रयास गरे ।
पानी राम्रोसँग उपलब्ध भएको भए यति क्षति हुने थिएन’ उनले भने । राराछायानाथ नगरपालिका–१ तल्लो गमगढी बजारमा आगलागी भएको हो । नेपाली सेना, सशस्त्र प्रहरी, नेपाल प्रहरी तथा स्थानीय बासिन्दाको सहयोगमा आगो निभाउने प्रयास जारी गरिरहेका छन् ।
अझै पनि आगो पूर्णरुपमा नियन्त्रणमा आएको छैन । ‘आगलागीको जानकारी आउनेवित्तिकै देखि निभाउने प्रयास जारी छ’, प्रमुख जिल्ला अधिकारी रोमबहादुर महतले भने, ‘घरहरु जोडिएकाले ठूलो क्षति भयो । २० घर जलेर पूर्णरुपमा नष्ट भएका छन् ।
एउटा घर आगो अरु फैलिन नदिनका लागि भत्काएका छौँ ।’ मानवीय क्षति नभएको बताएका प्रमुख जिल्ला अधिकारी महतले भने, ‘रातिको समयमा आगो लागेको तथा जोडिएका घर रहेको बस्तीमा निभाउनका लागि पर्याप्त स्रोत साधन नहुँदा समस्या भएको छ ।’
आगो थप घरमा फैलिन नदिइएको र जलेका घरहरु भने अझै जलिरहेको प्रमुख जिल्ला अधिकारी महतले बताए । ‘स्थानीय स्तरमा उपलब्ध सीमित पानी तथा माटोको प्रयोग गरेर आगो निभाउने प्रयास भएको छ । ठूलो भौतिक क्षति भयो’, उनले भने ।
यस्तै आगलागीमा घर जलेका आफन्त आफूहरुको आएको बताएका स्थानीय बासिन्दा क्रिंगा विक्रम शाही ठकुरीले पनि तल्लो गमगढी बजारमा पानीको अभाव हुनाले आगो निभाउन समस्या भएको बताए ।
Discussion about this post