सुर्खेत चैत २ गते ।
सरकारले आगामी बैशाख ३० गते स्थानीय तहको निर्वाचन मिति तोकेसँगै कर्णाली प्रदेशमा चुनावी माहोल बनाउन नेता कायकर्ताको दौडधुप बढ्दो छ ।
निर्वाचन मिति नजिकीदै गर्दा विभिन्न पार्टीका शिर्श नेताहरु प्रदेश राजधानी वीरेन्द्रनगरमा पुगेर प्रदेश, जिल्ला र पालिका पदाधिकारीहरुलाई प्रशिक्षण दिईरहेका छन् । पछिल्ला दुइ सातामा विभिन्न पार्टीका केन्द्रीय नेताहरु सुर्खेत पुगे ।
सुरुमा नेकपा एमालेका उपाध्यक्ष रामबहादुर थापा ‘बादल’ सुर्खेत जानु भएको थियो । उहाँ गएको केही समयमै माओवादी केन्द्रका अध्यक्ष पुष्पकमल दाहाल ‘प्रचण्ड’, नेपाली काँग्रेसका महामन्त्री गगन थापा, राप्रपा अध्यक्ष राजेन्द्र लिङ्देनले चुनाव केन्द्रीत प्रशिक्षण र आमसभा गरेर काठमाडौं फर्किनु भएको छ ।
उहाँहरुले आगामी स्थानीय तहको निर्वाचनमा आफ्नो विरासत कायम राख्ने गरी पार्टीका तल्लो तहका नेता तथा कार्यकर्तालाई प्रशिक्षण दिनुभएको छ । साना र ठुला राजनीतिक दलका नेताहरूले चुनावी माहोल बनाउनेदेखि जिल्लास्तर र पालिका स्तरमा भेला तथा सभाहरुको कार्यक्रमलाई निरन्तरता दिइरहेका छन् ।
सबै दलका नेताहरु गाउँ पसेपछि अहिले पार्टी प्रवेश गराउनेको होडवाजी नै चलिरहेको छ । टोल तहमै नेताहरु पुगेर कार्यकर्तालाई प्रशिक्षण र चुनाव लक्षित गतिविधिलाई तिव्रता दिएका छन् ।
नेपाली काँग्रेसले एक महिने गाउँ–गाउँ जाउँ कांग्रेस जिताउँ अभियान थालेको छ । नेकपा एमाले, नेकपा माओवादी केन्द्र, एकीकृत समाजवादी, राप्रपा लगायतका दलहरुले चुनावी माहोल तयार गर्न पार्टीका तल्लो कमिटीसम्मै चुनावी गतिविधिलाई बढवा दिइरहेका छन् ।
Discussion about this post