बाँके जेठ ६ गते ।
नेपाल विद्युत प्राधिकरण विरुद्ध शुक्रबार नेपालगन्जमा प्रदर्शन गरिएको छ । अघोषितरुपमा विद्युत कटौती गरिएको भन्दै नेपालगन्ज आम नागरिक समूहले प्रदर्शन गरेको हो । गर्मीको सहरमा विद्युत नियमित हुन सकेको छैन।
छिन–छिनमा बत्ती जाने र लो भोल्टेजको समस्याले स्थानीय आक्रोशित भएका छन् । नेपालगञ्जमा भारतबाट १२ र नेपालबाट १८ मेगावाट विद्युत आइरहेको छ ।
यतिले नेपालगञ्ज र आसपासलाई पुग्ने विद्युत कार्यालयले जनाएको छ। विद्युत पुग्ने मात्रामा आइरहँदा बत्ती भने छिनछिनमा जाने र लो भोल्टेज आउने समस्या रहेको छ।
विद्युत प्राधिकरण केन्द्र, नेपालगञ्ज वितरण शाखाका प्रमुख दिवाकर प्याकुरेलले केही समस्याले गर्दा विद्युत अनियमित भएकाले त्यसलाई समाधान गर्नतिर लागेको बताउनुभयो ।
भारतले १२ मेगावाटसम्म विद्युत दिइरहेको छ। नेपालले त्यो सबै छोड्न सकेको छैन। भारतले १२ मेगावाटसम्म विद्युत दिए पनि एघार, साढे एघारसम्म मात्रै छोडिरहेको विद्युत कार्यालयका कर्मचारीहरु बताउँछन्।
१२ मेगावाट नै छोड्दा तार चुडिने डर रहेको छ । भारतले दिएको लाइन बिपीचोकदेखि दक्षिणतिर सप्लाइ हुन्छ। यो नेपालगञ्ज वितरण केन्द्रबाट छोडिन्छ।
बिपीचोकदेखि उत्तरतिर बसपार्कमा रहेको सबस्टेसनबाट लाइन छोडिन्छ। यहाँ नेपालको लाइन आउँछ। भारतबाट आएको भन्दा नेपालबाट आएको लाइन जोडिएका क्षेत्रमा बढी समस्या हुने गरेको छ।
भारतको नानपाराबाट ३३ केभी प्रशारण लाइन जोडिएको छ। ३३ भनिए पनि भारतले २४ केभीसम्म छोड्ने गरेको छ। यो लो भोल्टेजले गर्दा नेपालगञ्जमा समस्या हुने गरेको छ।
विरोध प्रदर्शनमा घरेलु तथा साना उद्योग महासंघकी अध्यक्ष मधु खड्का, उद्योग बाणिज्य संघका पूर्वअध्यक्ष कृष्णप्रसाद श्रेष्ठ, नागरिक अभियान्ताहरु दिनेश थापा, विनोद कर्ण, साहिल अनसारीलगायतले प्राधिकरणको चर्को आलोचना गरेका थिए ।
Discussion about this post