बाँके जेठ २६ गते ।
४१ डिग्री सेल्सियस गर्मी छ । बाहिर त के पंखा चलाएर घर भित्र बस्दा समेत शरिरमा पसिना आउन छाड्दैन । गर्मीले नेपालगन्जबासीलाई असह्य बनाएको छ ।
त्यसैमा विद्युतको लो–भोटेज समस्याले नेपालगन्जबासीलाई झनै यातना दिएको छ । नेपालगन्ज उपमहानगरपालिका ४ गणेशपुरका सलमान सिद्धिकीको घरको पंखा नियमित रुपमा चलिरहेको छ, तर उनको शरिरबाट पसिना अविरल बगिरहेको छ ।
उनी घरि–घरि पंखातिर आँखा लगाउँछन् । विद्युतको भोल्टेज आउने आशामा बस्छन् । तर, उनको घरको पंखाको गति बढ्नुको साटो झन–झन घट्दै जान्छ । उनी निराश हुन्छन् ।
‘पंखा स्पिडमा चल्दा केहि राहत हुन्छ, तर लो–भोटेजले पंखा बल्लतल्ल घुम्छ मात्र हावा फाल्दैन । यस्तो भयो भने झनै तनाव हुन्छ,’ उनले भने । लो–भोल्टेजको समस्याले नेपालगन्ज उपमहानगरपालिका ९, बाँकेका गाउँका रामबुझाउन रैदासको घरको पंखा पनि अलि–अलि मात्र घुम्छ । स्पिडमा पंखा नघुम्दा उनलाई दिन कटाउन गाह्रो भएको छ ।
विहानीपख केहि राहत भए पनि दिउँसो र बेलुका सहन नसक्ने गर्मी हुने गरेको उनले बताए । ‘बल्लतल्ल पंखा घुम्छ । तै पनि विच–विचमा विद्युत अवरुद्ध भएर झनै हैरान बनाउँछ,’ उनले भने ।
लो–भोल्टेजले एसि, कुलर प्रयोगकर्ताले झनै सास्ती ब्यहोर्नु परेको छ । ‘पंखा त बल्लतल्ल चल्छ । एसि र कुलर चल्ने त कुरै भएन । एसि हेर्ने सिवाय कुनै उपाय छैन,’ नेपालगन्ज उपमहानगरपालिका २ घरबारी टोलका पप्पु सैयदले भने ।
नेपाल विद्युत प्राधिकरण वितरण केन्द्र नेपालगन्जका प्रमुख दिवाकर प्याकुरेलले लो–भोल्टेज समस्या नेपालगन्जमा मात्र नभई देशब्यापी समस्या भएको बताए ।
लो–भोल्टेज हुनुको कारण सोध्दा उनले यसको जवाफ आफूसँग नभएको बताए । नजिकै जलविद्युत नभएका कारण लो–भोल्टेज समस्या भएको उनले अनुमान लगाए । ‘लो–भोल्टेज हुनुको कारण मलाई पनि थाहा भएन, तर टाढाबाट विजुली ल्याउँदा केहि प्रतिशत विद्युत घट्न जान्छ,’ उनले भने । नेपालगन्जको अधिकतम तापक्रम ४१ डिग्री सेल्सियस नेपालगन्जमा अत्यधिक गर्मी छ ।
यहाँ ३८–४१ डिग्री तामक्रम मापन हुँदै आएको छ । मौसम विज्ञान विभाग, फिल्ड कार्यालय राँझाका अनुसार १९ जेठमा यहाँको अधिकतम तापक्रम ३८ डिग्री रहेको थियो । त्यसैगरी, २० जेठमा ३९ दशमलव २, २१ जेठमा ४० दशमलव ८, २२ जेठमा ३८ दशमलव ५ र २३ जेठमा ३९ दशमलव ४ डिग्री तापक्रम मापन गरिएको छ ।
२४ जेठमा नेपालगन्जको तापक्रम ३९ दशमलव ३ डिग्री मापन भएको थियो । भने, २५ जेठमा तापक्रम केहि तल झरेर ३८ दशमलव ८ डिग्री सेल्सियस रहेको जल तथा मौसम विज्ञान विभाग फिल्ड कार्यालय नेपालगन्जका प्रमुख पलबहादुर विश्वकर्माले जानकारी दिए ।
Discussion about this post