सुनसरी जेठ ३० गते ।
सुनसरीको इटहरीस्थित जुट विकास क्षेत्रमा देखिएको चितुवा नियन्त्रणमा आएको छ।
इलाका प्रहरी कार्यालय इटहरीका प्रमुख प्रहरी नायब उपरीक्षक खगेन्द्र खड्काका अनुसार सोमबार दिउँसो करिब १ बजे चितुवालाई बेहोस बनाएर नियन्त्रणमा लिइएको हो।
बिहानीपख करिब साढे ५ बजे मानव बस्तीमा देखिएको भाले चितुवा अत्तालिएको अवस्थामा स्थानीय नेरु चौधरीको घरमा बसेको थियो। प्रहरी नायब उपरीक्षक खड्काका अनुसार थकित र घाइते चितुवा घरको प्यासेजमा बसेपछि करिब साढे ६ घण्टापछि दिउँसो १ बजेतिर नियन्त्रणमा आएको हो। नियन्त्रित चितुवा जिल्ला वन डिभिजनल कार्यालय सुनसरीमा रहेको उनले बताए।
चितुवा नियन्त्रणका लागि विराटनगरस्थित पशुपंछी तथा मत्स्य विकास निर्देशनालय, प्रदेश १ कार्यालय र कोशी टप्पु वन्यजन्तु आरक्षको प्राविधिक टोली, सुरक्षा निकायको टोली खटिएको थियो।
सुनसरी वन डिभिजनल कार्यालयका वन अधिकृत गोपाल दाहालका अनुसार चितुवा नियन्त्रणका लागि डार्ट प्रहार गरिएको थियो। जसका कारण चितुवा बेहोस भएको उनले बताए। वन अधिकृत दाहालले चितुवा करिब ४० केजी र २ वर्ष उमेरको भएको अनुमान गरेका छन्। खड्काले बिहानीपख जुटविकास उत्तरतर्फ पर्ने चारकोशे जंगलबाट चितुवा भित्रिएको हुनसक्ने बताए।
उपमहानगर क्षेत्रमा पहिलो पटक चितुवा देखिएको बताएका प्रहरी नायब उपरीक्षक खड्काले चारकोशे जंगलमा समेत राति र बिहानीपख हिँड्डुल गर्दा सचेत हुन आवश्यक रहेको बताउँछन्।
इटहरीबाट धरानतर्फ जान र भित्र पानमारादेखि अन्य क्षेत्र पुग्नका लागि जंगलको बाटो प्रयोग हुँदै आएको छ।
Discussion about this post