दाङ साउन १२ गते ।
दाङको राप्ती गाउँपालिकाले पालिकाभित्रका सबै विद्यालयमा जंक फुड निषेध गरेको छ । गाउँपालिकाले विद्यालय रहेको चार किल्ला एक सय मिटर वरपर जंक फुड तथा कोल्ड ड्रिंक्सजन्य वस्तुको बिक्री वितरणमा रोक लगाउने निर्देशन जारी गरेको हो ।
राप्ती गाउँ कार्यपालिकाको बैठकले सरकारी कार्यालय, स्वास्थ्य संस्था, विद्यालय, बैंक तथा वित्तिय संस्थालगायतले सार्वजनिक कार्यक्रम सञ्चालन गर्दा प्लाष्टिकका फूल, खादा तथा कोल्ड ड्रिंक्स, जंक फुडको प्रयोग नगर्ने निर्णय गरेको थियो । सोही निर्णय कार्यान्वनयनका लागि पालिकाले निर्देशन जारी गरेको हो ।
प्लास्टिकजन्य वस्तुको सट्टा स्थानीय स्तरमा उत्पादन भएका फूल तथा पुष्पजन्य वस्तुहरुको प्रयोग गर्न अपिल गरिएको छ। जंक फुडको सट्टा स्थानीय स्तरमा उत्पादन हुने खाना तथा खाजा बिक्री वितरण गर्ने व्यवस्था मिलाउन निर्देशन जारी गरेको गाउँपालिकाका अध्यक्ष प्रकाश विष्टले जानकारी दिनुभयो ।
यसैगरी राप्ती गाउँपालिकाले गरुङ्गो झोला बोकेर विद्यार्थी विद्यालय आउने बाध्यता हटाउने भएको छ । विद्यार्थी गरुङ्गो झोला नबोकी विद्यालय आउने वातावरण मिलाउन निजी तथा सामुदायिक विद्यालयलाई निर्देशन जारी गरिएको छ ।
Discussion about this post