बाँके भदौ २० गते ।
नेपालगन्ज उपमहानगरपालिकाभित्र स्थानीय ब्यक्तिमा पनि डेंगु रोगको संक्रमण देखिएपछि लामखुट्टे नष्ट गर्ने अभियान सुरु भएको छ । नेपालगन्जको बसपार्क क्षेत्रमा बसोबास गर्ने एकजनामा डेंगु देखिएको थियो ।
स्थानीयमा डेंगु देखिएपछि अन्य ब्यक्तिमा सर्न नदिनका लागि डेंगु सार्ने लामखुट्टे नष्ट पार्ने अभियान सुरु गरिएको हो । स्वास्थ्यकर्मी, महिला स्वास्थ्य स्वयमसेविका, स्थानीयबासीको सहभागितामा आज बसपार्क क्षेत्रमा लामखुट्टे नष्ट पार्ने तथा जनचेतनामुलक कार्यक्रम संचालन गरिएको नेपालगन्ज उपमहानगरपालिका स्वास्थ्य शाखाका हेल्थ असिस्टेन्ट तेज वलीले जानकारी दिनुभयो ।
वडा नम्बर–४ का अध्यक्ष गोपाल पुनले डेंगुबाट नगरबासीलाई जोगाउन लामखुट्टे नष्ट पार्ने तथा जनचेतनामुलक कार्यक्रम सुरु गरिएको जानकारी दिनुभयो । एक्कासी ज्वरो आउने, टाउको मांसपेशी तथा जोर्नी दुख्ने थकान महसुस हुने, वाकवाकी लाग्ने वा बान्ता हुने,आफ्नो दैनिकी खानपानमा रुचि नलाग्ने डेंगुका लक्षण हुन् ।
पूरा बाहुला भएको लुगा लगाउने, झुल भित्र मात्र सुत्ने, घरको झ्याल ढोकामा लामखुट्टे नछिर्ने जाली हाल्ने, घर कार्यालय विद्यालय वा सार्वजनिक क्षेत्रमा पानी जम्न नदिने, खाल्डाखुल्डी पर्ने र खानेपानी वा ढल चुहिएको छ भने तत्काल मर्मत गर्ने, गमला प्लेट, फूल दानी, कुलर आदिको पानी कम्तीमा हप्ताको एक पटक फेर्ने र पानी जम्मा गर्ने भाँडालाई लामखुट्टे छिर्न नसक्ने गरी छोप्न चिकित्सकहरूको सुझाव छ ।
Discussion about this post