बाँके कात्तिक ३० गते ।
जनता समाजवादी पार्टीबाट बाँके क्षेत्र नं २ प्रतिनिधिसभाका उम्मेदवार मोहम्मद इश्तियाक राईले जनतालाई खरिद विक्री गर्छन् भन्ने सोचलाई गलत सावित गर्न डुडुवाबासीलाई अपिल गरेका छन् ।
डुडुवामा आयोजित चुनावी सभालाई सम्वोधन गर्दै उनले केही समुहले आफुलाई मत खरिद विक्री गर्ने गरेको बताएपछि उनले त्यसको जवाफ फर्काएका हुन् । उनले प्रतिस्पर्धी धवलशम्शेर राणा १० वर्ष मेयर हुँदा के के विकास गरे भनेर प्रश्न समेत गरेका छन् । उनले राणाले विकास निर्माणका कुनैपनि कार्य गर्न नसकेको आरोप लगाए ।
जनताको हरेक दुःखसुखमा आफूले सधैं साथ दिइरहेको भन्दै राईले फेरि पनि जनताकै चौकीदारी गर्नका लागि आफू चुनावी मैदानमा आएको बताए । र, त्यसको एकमात्रै आधार भनेको आम मतदाताले देखाएको उत्साह र हौसला नै रहेको उनको भनाइ छ । राईले जनता समाजवादी पार्टीप्रति यो क्षेत्रको मतदाताहरूको अटुट विश्वास र अथाह उत्साह पाइरहेको पनि बताएका छन् ।
हाम्रा मतदाताप्रति विश्वास छ । जनतासँग जो सधैं सँगसँगै हुन्छ, उसले कहिल्यै हार्नुपर्दैन’ उनले भनेका छन् ‘आम मतदाताले म र मेरा अरू साथीहरूप्रति देखाउनुभएको यो प्रेम र स्नेहको गुण मैले यहाँको विकास गरेर तिर्नेछु ।
मैले अरुले जस्तो जनता झुक्याउने काम गरेको छैन् ।’ राईले आफूले यसअघि गरेका कामहरूको मूल्याङ्कन यहाँका नागरिकले गरिसकेको र अझै विकासको सम्भावनाका लागि आफूहरूप्रति नै विश्वास व्यक्त गरेको पनि बताए । ‘अब हामी यो भन्न सक्छौं कि मतदाताको आफ्नो विवेकभन्दा ठूलो चुनावमा अरू हुनैसक्दैन ।
केही दलहरू मिलेर आफ्नो शान र शक्ति देखाउँदैमा भोट आउँदैन’ राई भन्छन् ‘हामीलाई फेरि पनि मतदाताले विश्वास गर्नुभएको छ । त्यही नै हाम्रो चुनाव जित्ने आत्मविश्वास पनि हो । हामीले कुनै पनि मतदाताको सपना खेर जान दिनेछैनौं ।’ उनले केही समूहले धर्म, जाति, समुदाय र सम्प्रदायको नाममा राजनीति गर्न खोजेको आरोप लगाए ।
उनले आफुले लोनमा व्यवसाय गर्दै आएको बताउँदै भ्रष्टाचार गरेको भए प्रमाणित गर्न चुनौति पनि दिएका छन् । उनले आफुले खुनपसिनाले सम्पति जोडेको पनि दावी गरेका छन् ।राईले भ्रष्टाचार कसले गरेको छ र विकास कसले गरेको छ भनेर आफु सधैं बहस गर्न तयार रहेको पनि सुनाए। ‘उनिहरू पनि यो क्षेत्रको उच्चस्थानमा बसेका छन्।
दश(दश वर्ष महानगर चलाएका छन्। उनिहरूले किन विकास गरेनन्रु आज काम गरिरहेको मान्छे देखेर उनिहरूलाई औडाह भइरहेको छ। र उनिहरू छटपटाइरहेका छन्। जनता सचेत भएको देखेर उनिहरू डराइरहेका छन्’ उनले भने ‘त्यसैले उनिहरू पछि लागिरहेका छन्।
मैले कसरी पैसा कमाए भनेर प्रमाणहरू खोज्न हिँडेका छन्। दुः ख गरिरहेका छन्। तर त्यत्रो दुः ख किन गर्नुपर्यो ? त्यो सबै त मैले सार्वजनिक गरिसकेको छु।
नभए कसैले मलाई सोधे पनि म भनिदिन्छु नि ?’ आफ्नो पुस्ताले समेत गर्व गर्नेगरि विकास ल्याउनका लागि नागरिकले जसपाप्रति अगाध स्नेह र उत्साह देखाइरहेको भन्दै विरोधीहरू अत्तालिएको बताउँदै राईले मतदाताहरूलाई मंसिर ४ गते विवेकपूर्ण मतदान गर्न आग्रह गरे।
Discussion about this post