सरला सुबेदी
बाँके मंसिर २१ गते ।
बाँके जिल्ला बैजनाथ गाउँपालिका वडा नम्बर १ मा रहेको रेरी बाँकेद्वारा सन्चालित बहिरा अपाङ्ग बालगृहमा ४४ जना भन्दा बढी विभिन्न जिल्लाका बहिरा अपाङ्ग बालबालिकाहरु रहेका छन् । रेरी बाँकेले बहिरा अपाङ्ग बालबालिकाहरुको लागि निशुल्क रुपमा खाने बस्ने व्यवस्था सहित बालगृह सन्चालनमा ल्याएको छ।
उक्त बालगृहमा बस्दै आएका बहिरा अपाङ्ग बालबालिकाहरु मध्य श्री दहित आधारभुत माध्यमिक विद्यालयमा ३७ जना बहिरा विद्यार्थीभाईबहिनीहरु निशुल्क अध्ययन गर्ने गर्दछन भने बाँकि सुर्योदय उच्च माबि चिसापानीमा अध्ययनरत छन् ।
विद्यालयमा जुम्ला , हुम्ला, मुगु, कालिकोट दैलेख बाँके बर्दिया दाङ लगायतका विभिन्न जिल्लाहरूबाट आएका बहिरा विद्यार्थीहरुलाई साङ्केतिक भाषामा पढाइने गरेको उक्त बिद्यालयमा दोभाषे रुपमा समेत काम गर्दै आएकी शिक्षिका शान्ती शर्माले बताएकी छिन् ।
उनले १ कक्षा देखि ३ कक्षासम्मका बहिरा बिद्यार्थिहरुलाई मात्र छुट्टै राखेर पढाउने गरेको र त्यसपछी ४ कक्षादेखि ८ कक्षासम्म त्यही बिधालयमा पढाइने र माध्यमिक र उच्चमाध्यमिक तहको पढाइका लागि सुर्योदय माबी चिसापानीमा लगिने गरिएको बताएकि छिन् । दिनभर विद्यालयमा र साझ र बिहान बालगृहमा रमाउने बिद्यार्थि भाइ बहिनिहरु चाडपर्व लगायत लामो छुट्टीको बेला आफ्नो आफ्नो घर जाने व्यवस्था समेत रेरी बाँकेले गरेको बताएकी छिन् ।
बुधबार एक बजेको समयतिर हामी बिद्यालयको प्राङ्गणमा पुग्दा बहिरा अपाङ्ग बालबालिकाहरु निकै खुसी हुँदै खेल्दै उफ्रीदै थिए । केहिबेर खेलेपछि उनिहरुलाई कक्षा कोठामा लगेर साङ्केतिक भाषामा पढाउने शिक्षिका अन्जु परियारले उत्साहित हुँदै पढाएकी थिइन । बहिरा अपाङ्ग भएर पनि आफुहरुले पढ्न लेख्न पाउँदा बालबालिका निकै हर्षित भएका थिए। बिद्यालयमा हाल २ जना मात्र बहिरा अपाङ्ग शिक्षक शिक्षिकाले पढाउदै आइरहेका छन् ।
बिद्यालयमा साङ्केतिक भाषा पढाउने शिक्षक शिक्षिका सङ्गसङै भौतिक पुर्वधार जस्तै खेलमैदानको समेत अभाव रहेको समेत बिद्यालय परिवारले जानकारी गराएको छ। बहिरा अपाङ्ग बालबालिकाहरुको लागि विशेष खालको कार्यक्रम ल्याइनु पर्ने र उनिहरुको भबिष्यको लागि स्थानीय सरकार मात्र नभैइ प्रदेश र केन्द्रिय सरकार समेत निरन्तर लागि रहनु पर्ने साङ्केतिक भाषा पढाउने बहिरा अपाङ्ग शिक्षिका अन्जु परियारले बताएकी छिन् ।
Discussion about this post