बाँके असोज १७ गते ।
नेपालगन्ज आज पूर्णरुपमा सुनसान छ । बाँके प्रशासनले मंगलवार दिउँसो १ बजेदेखि अनिश्चितकालका लागि कर्फ्यू जारी गरेपछि नेपालगन्ज सुनसान बनेको हो ।
नेपाल प्रहरी र सशस्त्र प्रहरीको टोली नेपालगन्जका मुख्य चोक, चौराह र सम्वेदनशिल क्षेत्रमा खटिएका छन् । आउजाउमा खडाई गरेपछि नेपालगन्जका सडक, गल्ली र चोक खाली देखिन्छन् । ठूलो संख्यामा परिचालित सुरक्षाकर्मीले अति आवश्यक काम र कार्यालय जाने कर्मचारीलाई मात्र आउजाउ गर्न दिएका छन् । कफर््यूले कार्यालय र औषधि उपचारका लागि आउने जानेहरुलाई सास्ती भएको छ ।
सुरक्षाकर्मीले सर्वसाधारणलाई घरबाट बाहिर निस्कन दिएका छैनन् । विशेषगरि सुरक्षाकर्मीहरु सदरलाइन, त्रिभुवन चोक, विपी चोक, त्रिवेणी मोडमा खटिएका छन् । नेपालगन्ज प्रवेशद्वारमा समेत ठूलो संख्यामा सुरक्षाकर्मी परिचालन भएका छन् ।
कर्फ्यूका क्रममा सुरक्षाकर्मीले संयमता अपनाएका छन् । बाहिर निस्कन खोज्नेलाई सम्झाई बुझाई घर भित्र बस्न आग्रह गरेको एक प्रत्यक्षदर्शीले बताए । उनका अनुसार कर्फ्यूको समयमा विरामी, उनका आफन्त र परिवारका सदस्यलाई सुरक्षाकर्मीले अस्पतालसम्म पुर्याएका छन् ।
नेपालगन्ज प्रवेश गर्ने विभिन्न नाकामा तैनाथ सुरक्षाकर्मीले बाहिरबाट हुने घुसपैठ रोकेका कारण नेपालगन्जमा थप हताहत हुन नपाएको नेपालगन्जका एक सर्वसाधरणले बताए । उनले नेपालगन्ज प्रवेश गर्ने मुख्य र सहायक सडकमा बसेर सुरक्षाकर्मीले नेपालगन्ज आउनेलाई रोकेको बताए ।
दसैँ मनाउन भारतबाट घर फर्किदै गरेका नेपाली जमुनाह नाकामा अलपत्र परेका नेपालीलाई स्कटिङ गरि प्रहरीले गन्तब्यतर्फ पठाएको इलाका प्रहरी कार्यालय जमुनाहका इन्चार्ज वरिष्ठ प्रहरी नायव निरीक्षक मिनबहादुर विष्टले जानकारी दिए ।
जमुनाह नाकामा अलपत्र परेका करिव दुई हजार नेपालीलाई स्कटिङ गरि गन्तब्यसम्म पुर्याएको उनले बताए । ‘अलपत्र परेका नेपालीलाई बसको ब्यवस्था गरि गन्तब्यसम्म पुर्याउने ब्यवस्था मिलाएका छौँ,’ उनले भने ।
Discussion about this post