बाँके मंसिर १२ गते ।
मालपोत र नापी कार्यालयले कोहलपुरबाट सेवा दिन थालेपछि सेवाग्राहीहरुलाई सहज भएको छ । कोहलपुरमा कार्यालय संचालन गरेर मालपोत र नापी कार्यालयले सेवा दिन थालेपछि तीनवटा पालिकाका सेवाग्राहीलाई सेवा लिन सहज भएको हो ।
गएको कात्तिक १ गतेबाट मालपोत र नापी कार्यालयले कोहलपुरबाट सेवा दिन थालेका हुन् । कोहलपुर, बैजनाथ र राप्तीसोनारीका २७ वडाका नागरिकको जग्गासम्बन्धी काम कोहलपुरबाट हुन थालेपछि नेपालगन्ज जानुपर्ने बाध्यता हटेको छ । सेवा लिन सहज भएको सेवाग्राहीको भनाइ छ ।
मालपोत कार्यालयमा सेवा लिन आएका बैजनाथ गाउँपालिका –७ का जीवन थारूले सानो कामले पनि नेपालगन्ज जानुपर्ने बाध्यताको अन्त्य भएपछि आफूहरुलाई निकै सहज भएको बताए । उनले कोहलपुरबाटै सेवा पाएपछि पैसा र समय दुवैको बचत भएको बताए । राप्तीसोनारी–४ का रमेश थापा पनि कोहलपुरबाट सेवा सुचारु भएपछि धेरै सहज भएको बताउँछन् । उनले अब कम समयमै धेरै काम र काम पनि छिटोछरितो तरिकाले भइरहेको बताए ।
कोहलपुर नगरपालिका, बैजनाथ र राप्तीसोनारी गाउँपालिकाका २७ वडाका नागरिकका जग्गासम्बन्धी सबै काम कोहलपुरबाटै भइरहेकाले सेवाग्राही र कर्मचारी दुबैलाई सहज भएको नापी कार्यालय कोहलपुरका अधिकृत दिनेशकुमार भण्डारीले बताए ।
Discussion about this post