बाँके माघ ७ गते ।
बाँकेको राप्तीसोनारी गाउँपालिका–४ बैजापुरस्थित जनशक्ति माध्यामिक विद्यालयमा १६ औं राष्ट्रपति रनिङ्ग शिल्ड छनौट प्रतियोगिता तथा छैठौं राप्तीसोनारी गाउँपालिका स्तरीय अध्यक्ष कप रनिङ्ग शिल्ड प्रतियोगिताको तयारी सुरु भएको छ ।
यही माघ ११ गतेदेखि सुरु हुने प्रतियोगिताको तयारी तीब्र पारिएको आयोजक विद्यालय व्यवस्थापन समितिका अध्यक्ष प्रदिप कुमार रजकले जानकारी दिए । उक्त प्रतियोगिताको एक कार्यक्रकाबीच राप्तीसोनारी गाउँपालिकाका अध्यक्ष तप्तबहादुर पौडेलले उद्घाटन गर्नेछन् । प्रतियोगितामा छात्रछात्रातर्फ भलिबल, कबड्डी र मार्सलआर्टका खेलमा प्रतिस्पर्धा हुनेछ ।
त्यसैगरी छात्रछात्रातर्फनै एक सय मिटर, दुई सय मिटर, चार सय मिटर, आठ सय मिटर, पन्ध्र सय मिटर, तीन हजार मिटर दौड पनि हुनेछ । छात्रछात्रातर्फनै रिले दौडमा पनि प्रतिस्पर्धा हुने आयोजक विद्यालयका प्रधानाध्यापक मायाराम चौधरीले बताए । त्यसैगरी छात्रछात्रतर्फ हाइजम्प, लङजम्प, त्रिपलजम्प, ज्याभलिङ थ्रो, आठ सय ग्राम सटफुटमा पनि विद्यार्थीले प्रतिस्पर्धा गर्नेछन् ।
आधारभूत विद्यालय तर्फ कक्षा एक देखि ३ सम्म छात्रछात्रामध्येबाट एक जना सहभागि हुने गरी चम्चा दौड, कक्षा चार र पाँचका छात्रछात्रा मध्ये प्रत्येक विद्यालयबाट एक जना सहभागि हुने गरी हिसाव दौड र कक्षा छ देखि आठसम्मका विद्यार्थीको लागि छात्रछात्रातर्फ एक सय मिटर, दुई सय मिटर र चार सय मिटर दौडका इभेन्टहरु प्रतियोगितामा समावेश गरिएको पनि आयोजक विद्यालयले जनाएको छ ।
प्रतियोगिता माघ १३ गतेसम्म चल्ने छ । प्रतियोगितामा छानिएका खेलाडीहरुले पालिका स्तरीय प्रतियोगितामा प्रतिस्पर्धा गर्नेछन् । पालिका स्तरीय प्रतियोगिताको तयारी जिल्ला खेलकुद विकास समितिले सुरु गरिसकेको जनाएको छ । फागुनमा जिल्ला खेलकुद विकास समितिले प्रतियोगिता आयोजना गर्ने तयारी गरेको छ ।
Discussion about this post