बाँके माघ ७ गते ।
नेपालगन्ज–कोहलपुर सडक खण्ड अन्तरगत नेपालगन्ज क्षेत्रमा पर्ने सडकमा ठूला ठूला खाल्डा छन् । ति खाल्डाले सवारी दुर्घटना निम्त्याउने खतरा बढे पनि नेपालगन्ज उपमहानगरपालिका बेखवर छ । जमुनाहदेखि राँझा चोकसम्म मात्र नभई नेपालगन्जका विभिन्न सडकमा परेका खाल्डामा परि कयौँ दुर्घटना भएका छन् । तर, नेपालगन्जका जनप्रतिनिधि उदासिन छन् । खाल्डाखुल्डी पुर्नुको साटो मौन भएर हेरिरहेका छन् ।
विपी चोकदेखि धम्बोझी चोकको विचमा खानेपानीको पाइप फुटेर सडक खनिएको छ । पाइप जडान भएको करिव हप्ता दिन पुगे पनि खाल्डो सामान्य तरिकाले पुरेर चारैतिरबाट ट्राफिक डिभाइडर राखिएको छ । सडकको वीच भागमा रहेको खाल्डो सडक एम्बुसको रुपमा रहेको सर्वसाधारण बताउँछन् । ‘तीव्र गतिमा रहेको सवारी साधन यो खाल्डोमा पर्नसक्ने सम्भावना प्रवल छ,’ नेपालगन्जका सन्तोष गुप्ताले अनलाइन खोजखवरसँग भने ।
यो त एउटा प्रतिनिधिमुलक खाल्डो मात्र हो । उपमहानगरभित्र यस्ता खाल्डा अनगिन्ति छन् । जुन खाल्डाले सर्वसाधारणको ज्यान जोखिममा पारिरहेका छन् । तर, उपमहानगरका जनप्रतिनिधि भने देखेर पनि नदेखेको भान गरिरहेका छन् । उल्टै सडक वत्ति र ट्राफिक लाइटको नाममा उपमहानगरले अति ब्यस्त चोकको सडक फोडेर सर्वसाधारणको ज्यान झनै जोखिममा पारेको छ । ‘उपमहानगरका जनप्रतिनिधिलाई दिउँसै लाइट बालेर खोज्नुपर्ने बेला भएको छ । विकास गर्नुभन्दा विनाशतर्फ जनप्रतिनिधि उन्मुख भएको अभाष भइरहेको छ,’ नेपालगन्ज उपमहानगरपालिका ६ फुल्टेक्राका अनुराग रेग्मीले भने ।
Discussion about this post