बाँके माघ ७ गते ।
बाँकेमा घाम नलागेको दुई साता बढी भइसक्यो । विहान र बेलुका लाग्ने हुस्सु र कुहिरोले सवारी साधन चलाउनै मुश्किल छ । दिउँसोको समयमा पनि हेडलाइट बालेर चालकहरुले सवारी साधन चलाइरहेका छन् । यस्तोमा सवारी दुर्घटनाको जोखिमबढी हुन्छ ।
यही कुरालाई दृष्टिगत गरी जिल्ला ट्राफिक प्रहरी कार्यालय बाँकेले एक महिना अघिदेखि नै सवारी साधनमाथि निगरानी बढाएको छ । नम्वर प्लेट मेटिएका सवारीसाधनलाई चेकिङस्थलमै नम्वर लेखाउने गरेको छ । नम्वर प्लेट मेटिएका सवारीसाधनले दुर्घटना गराएर भाग्दा पहिचानमा समस्या हुने भएपछि ट्राफिक प्रहरीले चेकिङस्थलमै मेटिएको नम्वर लेख्न लगाउने गरेको हो ।
आइतवारमात्रै कोहलपुर नेपालगन्ज सडकखण्डमा पर्ने राँझामा ५० वटा सवारीसाधनको मेटिएको नम्वर पुनः लेख्न लगाइएको छ । ट्राफिक प्रहरी सहायक निरीक्षक प्रकाश विकको नेतृत्वमा खटिएको प्रहरीको टोलिले राँझा चोकमा चेकजाँचका क्रममा ती सवारीसाधनको नम्वर प्लेट मेटिएको फेला पारेको थियो ।
ट्राफिक प्रहरी कार्यालय बाँकेका अनुसार सबै अस्थायी पोष्टहरुले यो अभियानलाई तीब्रता दिएका छन् । ट्राफिक कार्यालय बाँकेका प्रमुख गोपिकृष्ण सुवेदीका अनुसार हुस्सु र कुहिरोका कारण बढ्दो सवारी दुर्घटना न्यूनीकरणका लागि मेटिएका नम्वर प्लेट चेकिङस्थलमै लेखाउने र स्टीकर टास्ने काम भइरहेको बताए । उनले दुर्घटना न्यूनीकरणका लागि सवारीसाधन चेकिङलाई पनि तीब्रता दिएको उल्लेख गरेका छन् ।
Discussion about this post