बाँके फागुन ४ गते ।
गत मंसिरमा भएको प्रतिनिधि सभा चुनावमा राप्रपाका उम्मेदवार थिए डा. धवलशमशेर राणा । नेपालगन्ज उपमहानगरपालिकाका निवर्तमान मेयरसमेत रहेका डा. राणाले चुनाव जित्न नेपालगन्जमा रासायनिक मल कारखाना खोल्ने आश्वासन बाँडे । देशभर रासायनिक मलको हाहाकार भएकै बेला रासायनिक मलको कारखाना खोल्ने आश्वासन बाँडेपछि मतदाता दंग परे र भोट दिए । उनी प्रतिनिधि सभा सदस्यमा निर्वाचित पनि भए, तर उनको चुनावी नारा केवल नारामा सिमित भएको छ ।
चुनाव जितेर गएदेखि प्रतिनिधि सभाको वैठक धेरै पटक बसिसकेको छ । तर, उनले निर्वाचनका बेला गरेको प्रतिवद्धता र बाँडेको आश्वासन कार्यान्वयन गर्न अहिलेसम्म पहल गरेको देखिदैन । उनले प्रतिनिधि सभाको एउटा बैठकमा हरेक वर्ष किसानलाई रासायनिक मलको अभाव हुने गरेको बताउँदै रासायनिक मल कारखाना खोल्न माग गरेको प्रतिनिधि सभा वैठकको रेकर्डमा छ ।
बैठकमा बोल्दै सांसद राणाले आगामी बजेटमा मलको कारखाना खोल्नका लागि पर्याप्त बजेटको व्यवस्था गर्न माग गरेका थिए । तर, उनको माग सुनुवाई अझैँसम्म भएको छैन ।
उनले भने– ‘देशको सबैभन्दा ठूलो समस्या भनेको मलखादको फ्याक्ट्री हो । देशमा युरिया, डिएपी, पोटास मलको फ्याक्ट्री स्थापना गर्नेतिर लागियोस् । यो विषयमा डिपिआर भएको छ भन्ने सुन्नमा आएको छ । बजेट आउनुभन्दा अगाडि नै यसको बारेमा तयार गरियोस् । त्यो तयारीको जानकारी यो सदनलाई समेत गराइयोस् ।’
उनले सदनमा बोल्न क्रममा रासायनिक मलको फ्याक्ट्री नेपालगन्जमा खोल्नु पर्छ भन्ने आँट गरेनन् । बरु डिपिआर भएको आफूले सुनेको र यथार्थ जानकारी सदनलाई गराउन माग गरे ।
निर्वाचनका बेला रासायनिक मलको कारखाना खोल्ने आश्वासन बाँके क्षेत्र नं. २ का मतदाताले विर्सेका छैनन् । सांसद डा. राणाले निर्वाचनका बेला बाँडेको आश्वासन कहिले पूरा हुने हो हेर्न बाँकी छ ।
Discussion about this post