बाँके फागुन १५ गते ।
राप्ती सोनारी गाउँपालिकाका अध्यक्ष तप्त बहादुर पौडेलले राप्ती सोनारीका विभिन्न समस्या सम्वोधनका लागि राजधानी पुगेर सरोकारवालाहरुलाई ध्यानाकर्षण गराएका छन् । पालिका अध्यक्ष पौडेलले राप्ती सोनारीको समग्र विकासलाई केन्द्रमा राखेर सम्बद्ध सरोकारवाला पक्षको ध्यानाकर्षण गराउने काम गरिरहेको पौडेलसँगै रहेका हाइवे पोष्टकर्मी खड्क खत्रीले जानकारी दिए ।
पौडेल नेतृत्वको टोलिले सोमवार भूमि आयोगका अध्यक्ष केशव निरौलालाई भेटेर भूमि समस्या समाधानको पहलका निमित्त आग्रह गरेको छ । राप्ती सोनारी गाउँपालिकामा भूमिहीन दलित, भूमिहीन सुकुम्बासी र अव्यवस्थित बसोबासीको समस्या चुनौतीपूर्ण बनेकाले उनीहरुको व्यवस्थापनमा आयोगले ध्यान दिनुपर्नेमा उनको जोड थियो । उनले वर्षौदेखि जोतभोग गर्दै आएपनि उनीहरु अहिलेपनि लालपूर्जा विहीनको अवस्थामा रहेको भन्दै आयोगले त्यसतर्फ गम्भीर भएर सोच्नु पर्नेमा पौडेलले जोड दिए ।
उनले आयोगकै पहलमा अहिले राप्ती सोनारी गाउँपालिकामा निस्सा वितरण र ऐलानी जग्गाको नापजाँच चलिरहेको पनि अध्यक्ष मैनालीलाई जानकारी गराए । तर वर्षौदेखि काम भइरहेपनि लालपूर्जा पाउनेमा लक्षित वर्ग सशंकीत रहेको भन्दै यो पटक आयोगले समस्यालाई किनारा लगाउने गरी काम गर्नुपर्ने सुझाव दिए । त्यसक्रममा अध्यक्ष मैनालीले यो पटक आयोगले परिणाम दिने गरी काम गरिरहेको बताए ।
उनले भूमिहीन समस्या लामो समयदेखि चलिरहेकाले यसलाई टुंगोमा पुर्याउने गरी काम गरिने उल्लेख गरे । उनले राप्ती सोनारीको जस्तै समस्या देशभरी रहेकाले देशैभरको समस्या समाधान गर्ने गरी आयोग लागि परेको पनि बताए । यसैगरी अध्यक्ष पौडेलले हिमाल डेन्टल अस्पतालका संचालकहरुसँग पनि भेटघाट गरेको छ । हालैमात्र आँखा उपचार सेवा सुरु गरेको राप्ती सोनारी गाउँपालिकाले डेन्टल सेवापनि विस्तारको योजना बनाएको छ ।
तिलगंगा आँखा अस्पतालसँगको सहकार्यमा पालिकाले राप्ती सोनारी अस्पतालबाट आँखा ओपिडी सेवा सुरु गरेपछि आँखाका बिरामीलाई ठूलो राहात पुगेको छ । त्यसैगरी दन्त उपचार सेवा अर्थात डेन्टल उपचारलाई पनि कसरी संचालन गर्न सकिन्छ भन्ने विषयमा हिमाल डेन्टल अस्पतालका संचालकहरुकासँग छलफल गरिएको हो ।
पालिकाले कार्यविधि नै बनाएर डेन्टल सेवालाई पनि विस्तार गर्ने योजना बनाएको अध्यक्ष पौडेलले बताए । त्यसक्रममा हिमाल डेन्टल अस्पतालले कन्सल्टेन्ट सहयोग गर्न नसकिने भएपनि प्राविधिक सहयोगको प्रतिबद्धता जनाएको छ । पौडेलसहितको टोलिमा नेपाली काँग्रेसका क्षेत्रीय सभापति पोषण केसी, युवा नेता तथा काँग्रेस लुम्विनी प्रदेश सदस्य टेक नारायण भुसाल, अध्यक्ष पौडेलका सल्लाहाकार पवन शाहलगायत सहभागी छन् ।
Discussion about this post