लुम्बिनी चैत ३ गते ।
लुम्बिनी प्रदेशस्तरीय होमस्टे सम्मेलन देउखुरीको कठबेरुवामा आज शनिवारदेखि सुरु हुने भएको छ। तीन दिन प्रदेशस्तरीय होमस्टे सम्मेलन हुन लागेको हो । होमस्टे महासंघ लुम्बिनी प्रदेशले शुक्रबार लमहीमा पत्रकार सम्मेलनको आयोजना गर्दै सम्मेलनको बारेमा जानकारी गराएको हो।
राजपुर गाउँपालिका वडा नं. १ स्थित कठबेरुवामा प्रदेशका १२ जिल्लाका करिब दुई सय होमस्टे सञ्चालकहरु भेला हुने, बैठक बस्ने, औपचारिक रुपमा सम्मेलनको उद्घाटन गर्ने र कठबेरुवा घोषणापत्र जारी गरेर सम्मेलन सम्पन्न गर्ने कार्यक्रम रहेको होमस्टे महासंघ लुम्बिनी प्रदेशका अध्यक्ष तीलकराज थारुले जानकारी दिए।
७ वटै प्रदेशमा प्रदेश समिति, जिल्ला समन्वय समिति, पालिकास्तरीय समिति गठन गरिएको छ। नेपालका ७७ जिल्लामा होमस्टे सेवालाई थप प्रभावकारी बनाउन संस्थागत सुदृढीकरण, सामुदायिक तथा निजी होमस्टेहरुको क्षमता विकास, प्रचारप्रसार तथा बजारीकरण, आधारभूत पूर्वाधार विकासका सवालमा सहयोग पुग्ने उद्देश्यका साथ होमस्टे मेला, महोत्सव तथा सम्मेलन गरिँदै आएको होमस्टे महासंघका केन्द्रीय महासचिव कृष्ण थारुले बताए।
लुम्बिनी प्रदेशमा १० वटा निजी र ४२ वटा सामुदायिक गरी ५२ वटा होमस्टे सञ्चालनमा छन्। दाङ जिल्लामा १४ स्थानमा सामुदायिक होमस्टे सञ्चालनमा रहेका छन्। दाङ जिल्लामा रहेका होमस्टेहरुलाई विशेष प्राथमिकतामा राखेर मौलिक कला, ज्ञान र सिपलाई विश्व बजारसम्म पु¥याउने र मौलिक कला, ज्ञान र सिपलाई आयआर्जनसँग जोड्न प्रदेशभरी रहेका होमस्टेहरुको जमघट गरी सिक्ने र सिकाउने थलोको रुपमा सम्मेलन हुन गइरहेको पत्रकार सम्मेलनमा जानकारी गराइएको छ।
नेपाल सरकारले जारी गरिएको होमस्टे (घरवास) सञ्चालन तथा व्यवस्थापन कार्यविधि २०६७, प्रदेश सरकार तथा स्थानीय तहले तयार पारेका होमस्टे कार्यविधिहरूसमेतलाई आधार मानेर नेपालको धार्मिक, साँस्कृतिक, प्राकृतिक र जैविक विविधता एवं ऐतिहासिक सम्पदाहरूको संंरक्षण, उजागरण, सम्वर्द्धन गर्दै ग्रामीण एवं शहरी क्षेत्रको पर्यटन विकास गर्न होमस्टेको अवधारणा लागु गरिएको छ।
Discussion about this post