बुटवल, भदौ ३० गते ।
बुटवल उपमहानगरपालिकाले तिनाउ नदी आसपासका जोखिमयुक्त बस्ती पहिचान गरी विपत् पूर्वतयारीको योजना बनाउने भएको छ।
बर्खामा तिनाउको बहाव बढ्दा नदी किनारका बस्तीमा बाढी, डुबान र कटानको जोखिम हुने भएकाले वडा तहबाटै जोखिम क्षेत्र पहिचान गर्न लागिएको हो। त्यसका लागि प्राविधिकसहितको टोली परिचालन गरी नदीको बहाव, किनारको अवस्था, बस्तीको दूरी, भौगोलिक बनोट र विगतमा बाढी प्रभावित क्षेत्रको स्थलगत अध्ययन गरिने उपमहानगरपालिकाले जनाएको छ।
अध्ययनबाट तत्काल जोखिममा रहेका बस्ती तथा घरधुरी पहिचान गरी जोखिमको स्तरसमेत निर्धारण गरिनेछ। जोखिमअनुसार तत्काल सुरक्षा र पूर्वतयारी आवश्यक पर्ने क्षेत्र, संरक्षण तथा थप अध्ययन गर्नुपर्ने स्थान र दीर्घकालीन व्यवस्थापन गर्नुपर्ने क्षेत्र छुट्याइनेछ।
जोखिम पहिचानपछि पूर्वसूचना तथा उद्धारको व्यवस्था, सुरक्षित स्थानको पहिचान र आवश्यक सुरक्षा संरचना तथा पूर्वाधार निर्माणको योजना बनाइनेछ।
उपमहानगर प्रमुख खेलराज पाण्डेले विपत् भएपछि उद्धार र राहतमा मात्रै केन्द्रित हुनुभन्दा जोखिम पहिचान गरेर पूर्वतयारी गर्न आवश्यक रहेको बताए। “जोखिमयुक्त बस्ती पहिचान भएपछि स्थानीय बासिन्दालाई सम्भावित जोखिमबारे जानकारी गराउने र विपत्का बेला अपनाउनुपर्ने सावधानी तथा उद्धारको तयारीमा जोड दिइनेछ,” उनले भने।
प्रमुख प्रशासकीय अधिकृत दीपक ज्ञवालीले जोखिम पहिचानलाई एकपटकको अध्ययनमा सीमित नगरी आवश्यकता अनुसार अद्यावधिक गर्दै लगिने बताए। उनका अनुसार तयार हुने तथ्यगत विवरणका आधारमा तिनाउ किनारका बस्तीमा विपत् पूर्वतयारी तथा व्यवस्थापनका कार्यक्रम सञ्चालन गर्न सहज हुनेछ।
Discussion about this post