बाँके बैशाख ९ गते ।
वडा प्रहरी कार्यालय नेपालगन्जले ठूलो परिमाणमा अवैध सामान बरामद गरेको छ । नेपालगन्ज उपमहानगरपालिका २ घरबारी टोलस्थित खैरुन निशा शेषको घरबाट १० लाख आठ हजार ६० रुपैयाँ मूल्य पर्ने अवैध सामान बरामद गरेको बाँकेका प्रहरी प्रवक्ता डिएसपी नारायण डाँगीले जानकारी दिए ।
वडा प्रहरी कार्यालयका इन्चार्ज प्रहरी निरीक्षक हरिबहादुर विसीको नेतृत्वमा रहेको प्रहरी टोलीले शेषको घरमा छापा मार्दा भारतबाट अवैध रुपमा ल्याएर भण्डारण गरेका विभिन्न थरिका अवैध सामान बरामद भएको उनले बताए । सामान बरामद भए पनि सम्बन्धित ब्यक्ति पक्राउ नपरेको उनले बताए ।
उनका अनुसार, प्रहरीले सात लाख पाँच सय रुपैयाँ पर्ने दुई हजार आठ सय दुई जोर प्लाष्टिकको चप्पल, दुई लाख ५० हजार ८ सय मूल्य पर्ने एक हजार एक सय ४० थान लुगाको बेल्ट र ५६ हजार सात सय ६० रुपैयाँ बराबरको दुई सय ५८ थान र्यागजिन बेल्ट बरामद गरेको छ ।
गोप्य सूचनाको आधारमा छापा मार्दा बरामद भएको सामान तस्कर नाइके भौकीको भएको प्रहरी स्रोतले जनाएको छ । बरामद सामान थप कारवाहीका लागि नेपालगन्ज भन्सार कार्यालयमा बुझाइएको बाँके प्रहरीले जनाएको छ ।
यसअघि पनि वडा प्रहरी कार्यालय नेपालगन्जले नेपालगन्जका विभिन्न स्थानबाट अवैध सामान बरामद गर्दै आएको छ । अवैध सामान ओसार पसारमा संलग्नलाई कारवाहीको दायरामा ल्याउन वडा प्रहरी कार्यालयले सक्रियता देखाएपछि तस्करहरु त्रसित भएका छन् ।
Discussion about this post