बाँके बैशाख २० गते ।
बाँकेको खजुरा गाउँपालिका–२ गौघाट निवासी हरी बुढाक्षेत्री डेढ दशक अघि रोजगारको सिलसिलामा मलेसिया गएका थिए । त्यहाँ उनको कमाई राम्रै थियो । मासिक राम्रो तलब आउनेभएपछि नेपालबाट गएका युवाहरु ‘डिएक्सएन’ कम्पनीको ‘नेटवर्किङ बिजनेस’ तर्फ आर्कषित भए । मलेसियन उक्त कम्पनीले उत्पादन गरेका सामानहरु राम्रो थिए ।
कम्पनीबाट सिधै उपभोक्ताको हातमा जाने भएकोले किन्ने मानिसले धेरै छुट पाउने गर्छ । ‘नेटवर्किङ बिजनेस’ मार्फत नेपाली युवाहरुबिच परिचय हुँदै गएपछि नेपालमा लगानी गर्ने भन्दैं एउटा कम्पनीको स्थापना हुन्छ, त्यो हो एभरेष्ट गु्रप । मासिक रुपमा नेपालमा उक्त गु्रपमा पैसा पठाउने र उक्त गु्रपले नेपालको जलविद्युत, रिर्सोट, जग्गा, होटल, जिम क्लब लगायतका विभिन्न ठाउँमा लगाउने गर्ने विश्वास दिलाईयो ।
त्यही विश्वासमा विदेशमा भएका युवाहरुले कसैले बैंक, कसैले हुन्डी त कसैले आफनो परिवार मार्फत उक्त समुहले खोलेका अफिसमा मासिक रुपमा रकम जम्मा गर्ने गरेका थिए । यसरी कति रकम जम्मा भयो र कहाँ लगानी भएको छ स्पष्ट प्रमाण छैन अहिले । पिडितका अनुसार देशभरका युवाहरु यसरी ठगिएका छन् ।
आफुजस्तै हजारौ युवाको अर्बौ रकम ठगिएको हुन सक्ने अनुमान हरीको छ । खजुराका हरीले मासिक रुपमा सन् २०१५ देखि सन् २०२० सम्म ५ लाख ६५ हजार रुपैयाँ नेपालगन्ज–१८ तिल बहादुर राना मगरको नाममा पैसा पठाए । चार वर्ष अघि मलेसियाबाट नेपाल आएपछि हरीले आफनो लगानीको बारेमा खोज्न थाले । उनले लगानी गरेको रकम सुरक्षित नभएको भन्दैं फिर्ता गर्न ताकेता गरेपछि मात्र थाहा भयो हरीलाई आफु ठगिएको ।
पुरानो घर खजुरा–४ डि गाउँ भएका कारण आफनै गाउँघरको दाई भन्ने विश्वासमा उनले उक्त गु्रपमा रकम पठाउने गरेका थिए । अहिले आफुले गरेको लगानी कहाँ छ भनेर सोध्दा तिल बहादुरले स्पष्ट उत्तर नदिने गरेको हरी बताउँछन् । उनले भने, ‘हामीले दुःख गरेर कमाएको रकम उनीहरुले गलत तरिकाले व्यक्तिगत रुपमा खर्च गरेको रहेछन् । नेपाल आएपछि थाहाँ भयो, देखावटी रुपमा लगानी गरेर म जस्ता हजारौ युवाको अर्बौ रकम ठगेर उनीहरु भागिरहेका छन् ।
रकम फिर्ता गर्छु भनेर भन्थे, अहिले फोन पनि उठदैन् ।’ हरी अगाडी भन्छन, ‘मैले तिल बहादुर नाममा रकम पठाएको प्रमाण राखेको थिए । तर धेरै साथीहरुको त प्रमाण नै छैन् । म जस्ता धेरै साथी आफनो घर परिवार मार्पmत नेपालगन्जको कारकाँदो अफिसमा गएर तिल बहादुरलाई रकम बुझाएका छन् ।’ चार महिला अघि सम्म फोन सम्पर्कमा रहेका तिल बहादुर अहिले फोन सम्पर्कमा पनि नआएपछि हरी कानुनी रुपमा अगाडी बढने तयारीमा छन् । यसरी ठगिने हरी नमुना पात्र हुन् ।
बाँके, बर्दिया लगायतका हजारौ युवाहरुको रकम उक्त समुहले गलत तरिकाले खर्च गरेको आरोप लागेको छ । खाँडी मुलुक मलेसिया, साउदी अरब, कतार जस्ता देशहरुमा काम गरिरहेका हजारौं युवाहरुको अर्बौ रकम उक्त समुहले अपचलन गरेको आरोप लगाउँछन् हरी । खजुरा गाउँपालिका भित्रमात्रै आफुले चिनेका एक दर्जन साथीहरुको रकम यसरी हिनामिना भएको उनले बताए । खजुरा गाउँपालिका–२ कै राज कुमार सुनार, आशिष मगर, सुर्खेत मटेलाका मान बहादुर विसी लगायतको साथीहरुले आफुसँगै मासिक रुपमा तिल बहादुरको खातामा रकम पठाउने गरेको हरीले बताए ।
हरीले चिनेका तिल बहादुर केहि समय अघि नेपालगन्जको १८ नम्बर वडामा बसेर डिएक्सएनको व्यवसाय गरेर बसिरहेका थिए । तर हाल उनी काठमाडौंमा बसिरहेका छन् । यसरी बिदेशमा रहेका युवाहरुलाई ठग्ने मुख्य योजनाकारको रुपमा तिल बहादुरसँगै झापाका कृष्ण घिमिरे, काठमाडौंका पुकार छन्त्याल सहित एक दर्जन व्यक्तिहरु रहेको हरीले कालपृष्ठ दैनिकलाई बताए । युवाहरुको रकम ठगेको पैसाले कृष्णले दुबई र काठमाडौंमा व्यवसाय गरिरहेका छन् ।
पुकारले मलेसियामै व्यापार गरेर बसेका छन् । नेपालमा कानुनी रुपमा अप्ठयारोमा पर्ने भएकोले नेपालको सम्पुर्ण सम्पत्ति र व्यवसाय आफन्तहरुलाई रेखदेख गर्न दिएर उनीहरु बिदेश गएको आरोप छ । ठगीको आरोप लागेका तिल बहादुर राना मगरले झापाका कृष्णा घिमिरे, पुकार छन्त्याल लगायतको व्यक्तिको योजनामा आफुले बाँके क्षेत्रमा रकम संकलनको काम गरेको बताए । उनले भने, ‘म पनि पिडित छु । म भन्दा माथिल्लो निकायमा बसेर काम गरेका साथीले धोका दिए ।
उनीहरुले गरेको गलत काम कारण म पनि समस्यामा परेको छु । यस्तो विजनेसको मुख्य योजनाकार कृष्ण र पुकार हुन । उनीहरु अहिले विदेशमा छन् ।’ मंगलबार आफु ठगिएको प्रमाण सहित हरी जिल्ला प्रहरी कार्यालयमा पुगेका थिए । जिल्ला प्रहरी कार्यालय बाँकेले कानुनी रुपमा घटनाको अनुसन्धान प्रक्रिया अगाडी बढाउने जनाएको छ । जिल्ला प्रहरी कार्यालय बाँकेका प्रवक्ता एवम् डिएसपी नारायण डाँगीले सुरुआतमा ठगी मुद्दामा घटनाको अनुसन्धान गरिने बताए ।
Discussion about this post