बाँके जेठ १४ गते ।
वर्षभरि मेहनत गरेर तयार पारेको फसल क्षणभरमै जङ्गली जनावरले खाइदिनाले पीडित बनेका बाँके कम्दी कोरिडोरका अधिकांश किसान वैकल्पिक खेतीतिर लागेका छन् ।
पछिल्लो समय बाँके राष्ट्रिय निकुञ्जको स्थापना भएसँगै जनावरहरू आहारा खोज्दै गाउँ पस्न थालेर खेतबारीमा क्षति पु¥याउन थालेपछि यहाँका महिलाहरू बेसार खेतीतर्फ आकर्षित भएको आस्था सामुदायिक वन उपभोक्ता समूहका सदस्य पूर्णकला गिरीले बताइन् ।
अन्नबालीको उत्पादन लिन नसकेका किसानले बेसार खेतीबाट राम्रो आम्दानी लिन थालेको सामुदायिक वन उपभोक्ता समूहका सदस्य गिरीले बताइन् । जङ्गली जनावरले धान, मकै, गहुँलगायत अन्नबाली नोक्सान गरिदिँदा परम्परागत तबरले खेती गर्दै आएका किसानले विकल्पका रूपमा बेसार खेती सुरु गरेका छन् ।
कोहलपुर नगरपालिका–७, सल्यानी टोलमा रहेको आस्था सामुदायिक वन उपभोक्ता समूहमा १८ जना महिलाले बेसार उत्पादन सुरु गरेका छन् । सामुदायिक वनमा आबद्ध उपभोक्ताको आर्थिक अवस्था सुधार गर्ने उद्देश्यले तराई भूपरिधिले किसानलाई निःशुल्क रूपमा बेसारको बिउ तथा तालिमसँगै एक लाख १० हजारको बेसार पिस्ने र प्याकिङ गर्ने मेसिनसमेत उपलब्ध गराएको तराई भूपरिधि कार्यक्रमका फिल्ड सुपरभाइजर तिलक चौधरीले बताए ।
Discussion about this post