नयाँ दिल्ली जेठ २७ गते ।
भारतीय जनता पार्टीका नेता नरेन्द्र मोदीले तेस्रो कार्यकालका लागि प्रधानमन्त्रीको शपथ लिएका छन्। उनले आइतबार साँझ राष्ट्रपति द्रौपदी मुर्मुसमक्ष तेस्रो कार्यकालका लागि शपथ लिएका हुन्। मोदी पहिलो पटक सन् २०१४ मा प्रधानमन्त्री बनेका थिए। त्यस्तै, २०१९ मा दोस्रो कार्यकालका लागि प्रधानमन्त्री बनेका थिए।
पहिलो र दोस्रो कार्यकालका लागि मोदी प्रधानमन्त्री बन्दा ५४३ सदस्यीय लोकसभामा भाजपा एक्लैको बहुमत थियो। यसपटकको निर्वाचनमा भने भाजपाले २४० सिट मात्रै जित्न सक्यो। सरकार बनाउन लोकसभामा २७२ सांसदको समर्थन आवश्यक हुन्छ। यसपटक भने बहुमतको लागि मोदी एनडिए गठबन्धनमा निर्भर छन्।
प्रधानमन्त्रीमा मोदीको शपथसँगै ६९ जना मन्त्रीले पनि पद तथा गोपनीयताको शपथ लिएका छन्। मोदीले मन्त्रिपरिषद्मा थुप्रै पुराना अनुहारलाई निरन्तरता दिएका छन्। उनले आफ्ना पुराना सहकर्मीहरु अमित शाह, राजनाथ सिंह, नितिन गडकरी, निर्मला सीतारमण, पियुष गोयल, एस जयशंकर लगायतलाई यसपटक पनि निरन्तरता दिएका छन्।
भारतीय सञ्चारमाध्यमका अनुसार हरदीप सिंह पुरी, गिरिराज सिंह, अनुप्रिया पटेल, ज्याोतिरादित्य सिन्धिया, जेपी नड्डा, मनसुख मान्डबिया, ललन सिंहलगायत पनि मोदी मन्त्रिमण्डलमा स्थान पाएका छन्।
Discussion about this post