दाङ साउन १६ गते ।
खोलाले बगाउँदा दाङमा एक जनाको मृत्यु भएको छ । मृत्यु हुनेमा तुलसीपुर उपमहानगरपालिका–२ झारगाउँ निवासी ६७ वर्षीय तेजबहादुर भण्डारी रहेको प्रहरीले जनाएको छ ।
इलाका प्रहरी कार्यालय तुलसीपुरका सूचना अधिकारी तथा प्रहरी निरीक्षक प्रकाश थापाले दिएको जानकारी अनुसार शान्तिनगर गाउँपालिका–४ गिधनियामा रहेको आफन्तको घरमा गएर फर्किने क्रममा चिराघाट खोला तर्दै गर्दा बुधवार दिउँसो १२ बजे तिर खोलाले बगाएको थियो । प्रहरीका अनुसार खोलाले मृतक तेजबहादुर र उनकै भाइ ६४ वर्षीय चेतबहादुर भण्डारीलाईसँगै बगाएको थियो ।
चेतबहादुर भने पौडी खेलेर बाहिर निस्कन सफल भए पनि तेजबहादुरलाई खोलाले बगाएको थियो । खोलामा बगेका तेजबहादुरलाई स्थानीयले करिब एक किलोमिटर तलबाट उद्धार गरेका थिए । खोलाले बगाइरहेको स्थानीयले देखेपछि बाहिर निकाल्दा मृत्यु भइसकेको इलाका प्रहरी कार्यालय तुलसीपुरले जनाएको छ ।
Discussion about this post