बाँके, कात्तिक २५ गते ।
बाँकेको जानकी गाउँपालिका–३ कोरियनपुरका व्यवसायी अमरबहादुर ओलीले १४ वर्ष लगाएर खडा गरेको व्यवसाय एकै रातमा गुमाएका छन् । गत आइतबार साँझ भएको आगलागीले उनका दुई व्यापारिक फर्म पूर्ण रूपमा नष्ट भएका छन् । आगलागीबाट तीन करोड रुपैयाँभन्दा बढीको क्षति भएको उनको प्रारम्भिक अनुमान छ ।
ओलीले सञ्चालन गर्दै आएका लक्ष्मी बिजुली भण्डार एण्ड जनरल अर्डर सप्लायर्स र जय हनुमान ट्रेडर्स एण्ड सप्लायर्समा आगलागी भएको हो । इन्भर्टरको ब्याट्री पड्किएपछि सल्किएको आगोले पसलमा रहेका विद्युत्का तार, इलेक्ट्रोनिक सामग्री, ट्रान्सफर्मरलगायत सबै सामान जलेर नष्ट गरेको उनले बताए ।
कात्तिक २२ गते साँझ पौने ६ बजे विद्युत् आपूर्ति बन्द भएको थियो । करिब १० मिनेटपछि बत्ती आएलगत्तै बढी भोल्टेजका कारण इन्भर्टरको ब्याट्री पड्किएको ओलीले बताए । आफू पसलभित्र पस्दा ब्याट्री पड्किएको र त्यसबाट तारमा आगो सल्किएको उनले बताए ।
‘इन्भर्टरको ब्याट्री पड्किएपछि तारमा आगो सल्कियो । केही बेरमै पसलमा राखिएका तार, इलेक्ट्रोनिक सामान र ट्रान्सफर्मरमा आगो फैलियो । हेर्दाहेर्दै सबै सामान जल्यो,’ उनले भने ।
आगलागीबाट ठूलो परिमाणमा विद्युत्का तार र इलेक्ट्रोनिक सामान नष्ट भएका छन् । तीनदेखि चार हजार रुपैयाँ पर्ने तारसमेत जलेर नष्ट भएको उनले बताए । पसलमा राखिएका करिब चारवटा ट्रान्सफर्मर पनि आगलागीमा नष्ट भएको उनको भनाइ छ ।
पसलमा रहेका सामानको बिल र खरिदसम्बन्धी कागजातसमेत जलेका छन् । त्यसैले वास्तविक क्षतिको विवरण निकाल्न कठिन भएको उनले बताए । अहिले सामान खरिद गरेका कम्पनी तथा आपूर्तिकर्ताबाट बिलका प्रतिलिपि मगाउने काम भइरहेको छ ।
‘अहिलेसम्मको अनुमानमा तीन करोडभन्दा बढीको सामान नष्ट भएको छ । बिलका प्रतिलिपि आएपछि मात्रै वास्तविक क्षति यकिन हुन्छ,’ उनले भने ।
आगलागीबाट भएको क्षतिको तुलनामा बिमा रकम निकै कम छ । ओलीले दुवै फर्मको डेढ करोड रुपैयाँ बराबरको मात्रै बिमा गराएका थिए । बैंकबाट लिएको ऋणअनुसार बिमा गराएको र सबै सामानको पूर्ण बिमा गर्ने आर्थिक क्षमता नभएकाले डेढ करोडको मात्रै बिमा गराउन सकेको उनले बताए ।
आगलागी सुरु भएलगत्तै दमकल, जनप्रतिनिधि र सुरक्षाकर्मीलाई खबर गरे पनि समयमै दमकल नपुगेको ओलीको गुनासो छ । उनका अनुसार आगलागी भएको खबर गरेपछि डेढदेखि दुई घण्टापछि मात्रै दमकल घटनास्थल पुगेको थियो ।
‘आगो लाग्नेबित्तिकै दमकललाई खबर गरेका थियौँ । मेयर र वडा अध्यक्षलाई पनि जानकारी गराएका थियौँ । तर, डेढदेखि दुई घण्टापछि मात्रै दमकल आयो । त्यो पनि आधा ट्यांकी पानी लिएर आएको थियो,’ उनले भने, ‘समयमै दमकल आएको भए केही सामान भए पनि जोगाउन सकिन्थ्यो ।’
आगलागी नियन्त्रणका लागि स्थानीय बासिन्दासँगै प्रहरी, सशस्त्र प्रहरी र नेपाली सेना पनि खटिएका थिए । साँझ ६ बजेदेखि लागेको आगो राति १२ बजेसम्म नियन्त्रणमा लिने प्रयास गरिएको उनले बताए । सुरक्षाकर्मी र स्थानीयको प्रयासमा आगो नियन्त्रणमा आए पनि फर्मको संरचनासहित अधिकांश सामान जोगाउन नसकिएको उनको भनाइ छ ।
आगलागीबाट व्यवसायका सबै संरचना र सामान गुमाएपछि ओलीले पुनः व्यवसाय सञ्चालनका लागि सहयोगको अपिल गरेका छन् । १४ वर्षको मेहनतबाट स्थापित व्यवसाय एकै रातमा नष्ट भएको र अहिले आफैँले पुनः व्यवसाय सुरु गर्न सक्ने अवस्था नरहेको उनले बताए ।
आगलागीपछि फेसबुकमार्फत सहयोगको आग्रह गरेका ओलीलाई केही इष्टमित्र तथा शुभेच्छुकले आर्थिक सहयोग गरेका छन् । धेरैले फोन र प्रत्यक्ष भेटेर सहानुभूति व्यक्त गरेको उनले बताए ।
‘१४ वर्षसम्म दुःख गरेर व्यवसाय बनाएको थिएँ । तर, एकै रातमा सबै सकियो । अहिले म निकै पीडामा छु । घरसमेत बैंकको ऋणमा छ । यस्तो अवस्थामा फेरि व्यवसाय कसरी सुरु गर्ने भन्ने चिन्ता छ,’ उनले भने, ‘सबैले आफूले सकेको सहयोग गरिदिनुहोला ।’
तीन करोडभन्दा बढीको क्षति, डेढ करोडको मात्रै बिमा र घरको ऋणको दायित्वका बीच ओली अहिले पुनः व्यवसाय सञ्चालन गर्ने आधार खोजिरहेका छन् ।
Discussion about this post