लुम्बिनी असोज १८ गते ।
विपद्जन्य घटनामा राहत तथा पुनःस्थापनाका लागि लुम्बिनी प्रदेश सरकारले १२ जिल्लाका लागि ४० लाख रुपैयाँ निकासा गरेको छ । प्रदेश सरकारले उपलब्ध गराएको रकम विपद्मा परेका र पुनःस्थापनाको लागि जिल्ला प्रशासन कार्यालयले वितरण गर्नेछन् । साउन, भदौ र असोज महिनाको १३ गते सम्मको विवरण अनुसार राहततर्फ ३४ लाख ७५ हजार र पुनःस्थापनातर्फ ५ लाख २५ हजार रुपैयाँ निकासा गरेको हो ।
आन्तरिक मामिला तथा कानुन मन्त्रालयका उपसचिव राजेन्द्रप्रसाद पन्थीका अनुसार राहततर्फमा सबैभन्दा धेरै दाङ जिल्लामा २३ लाख ३५ हजार, रोल्पा जिल्लामा ३ लाख ८० हजार, बर्दिया जिल्लामा २ लाख, रुपन्देहीमा एक लाख ३० हजार, कपिलवस्तु जिल्लामा ३० हजार रुपैयाँ राहत स्वरुप वितरण गरिएको छ । यस्तै, पुनःनिर्माणको लागि प्यूठान जिल्लामा पाँच लाख २५ हजार रुपैयाँ उपलब्ध गराइएको छ । बाढी, पहिरो, आगलागि, चट्याङ् लगायतमा विपद्मा परेकालाई प्रहरीको मुचुल्का र जिल्ला प्रशासन कार्यालयको सिफारिसको आधारमा आन्तरिक मामिला तथा कानुन मन्त्रालयले राहत र पुर्नस्थापनाको लागि रकम उपलब्ध गराउँदै आएको उनले बताए ।
आर्थिक वर्ष २०८१÷०८२ को साउन एक गते देखि असोज १३ गते सम्म प्रदेशमा विपद्का ४ सय ६ घटना घटेका छन् । जसमा परेर ९५ जनाको मृत्यु भएको छ भने दुई सय ७ जना घाइते र १० जना बेपत्ता भएको विवरण छ । हाल सम्मको विपद्को घटनाले गर्दा पाँच करोड ११ लाख ९५ हजार पाँच सय रुपैयाँको क्षती भएको छ ।
व्यक्तिगत घरमा पूर्ण्क्षती ७५, आंशिक घरमा क्षतीमा दुई सय ९१ छन् । यो अवधिमा बाढीका ३०, पानीमा डुबेर ६०, अधिक वर्षा ६२, आगलागिका ५०, विषाक्त खाद्य सेवन १९, पहिरो २९, सर्पदंश ७८, जनावर आक्रमण १५ वटा घटना घटेका छन् । चट्याङका २२, तातो हावा लहरको एक, डुबानका ९, हावाहुरी एक र अन्य ३० गरी चार सय ६ वटा विपदका घटना घटिसकेको छ ।
बाढीमा परेर १०, पानीमा डुबेर ५१, आगलागिमा परेर एक जनाको मृत्यु भएको छ । यस्तै, विषाक्त खाद्य सेवनबाट २, पहिरोमा परेर ८, सर्पदंशबाट ९, जनावर आक्रमणबाट २ जनाको मृत्यु भएको छ । चट्याङमा परेर ६ जना, तातो हावा लहरबाट एक जना, अन्यबाट ५ जनाको मृत्यु भएको छ ।
Discussion about this post