बाँके असोज १९ गते ।
कोहलपुर–सुर्खेत १३२ केभी प्रसारण लाइनको निर्माण गर्दा देखिएको विवाद अदालतले किनारा लगाएको छ । बाँकेको बैजनाथ गाउँपालिका–४ बाँनियाभार र वडा नम्वर १ को गाभरका स्थानीयले जग्गा अधिकरणको विषयलाई लिएर विरोध जनाउँदै गत ३२ जेठ २०८१ मा उच्च अदालतमा रिट दायर गरेका थिए ।
यो ७० करोडमा निर्माण हुन लागेको हो । बाँनियाँभार ३ वटा र गाभरमा पाँचवटा विद्युतको टावर निर्माण अन्यत्र गर्न माग गर्दैे दायर गरेको रिट उच्च अदालत तुलसीपुर इजलास नेपालगन्जले किनारा लगाएपछि विवाद टुंगो लागेको छ । उक्त रिटमा सुनुवाइ गर्दै न्यायधीशद्वय पुनमसिंह चन्द र श्यामजी प्रधानको संयुक्त इजलासले माग दावी पुग्न नसक्ने भन्दै रिट निवेदन खारेज गरेको उच्च अदालत तुलसीपुर इजलास नेपालगञ्जका निमित्त रजिष्ट्रार सरोजनिधि वाग्लेले बताए ।
अदालतले विवाद किनारा लगाइदिएपछि निर्माण प्रक्रिया सुरु गर्ने तयारी रहेको कोहलपुर–सुर्खेत–दैलेख १३२ केभी प्रसारण लाइन आयोजनाका प्रमुख रवि चौधरीले बताए । अदालतले रिट खारेज गरेकाले पूर्णपाठको पर्खाइमा रहेको उनले बताए । ‘दसैँपछि पूर्णपाठ अदालतबाट उपलब्ध हुने भएकाले त्यो बेलासम्म थप काम अघि बढाउँदैनौँ,’ चौधरीले भने, ‘विवाद अदालतले सुल्झाएको छ ।
फैसलामा भने मुताविक हामी अघि बढ्छौँ।’ कर्णालीमा भरपर्दो बिजुली प्रसारणको संरचना छैनन् । भएका पनि भरपर्दा छैनन् । सामान्य अवस्थामा पनि बिना सूचना घण्टौँ बिजुली जाने कर्णाली प्रदेशको नियति जस्तै भइसकेको छ । गतिलो विद्युतको संरचना नहुँदा यसको मार नागरिकले थेगिरहेका छन् ।
Discussion about this post