बाँके कात्तिक ८ गते ।
लुम्विनी प्रदेशका आन्तरिक मामिला तथा कानुन मन्त्री आदेशकुमार अग्रवालले जनताको भावना बमोजिम काम गर्ने प्रतिवद्धता जनाएका छन् । सपथ ग्रहण लगत्तै नेपालगन्जस्थित जनता समाजवादी पार्टी (जसपा) को कार्यालयमा आयोजित कार्यकर्ता भेट्घाट कार्यक्रममा मन्त्री अग्रवालले यस्तो बताएका हुन् ।
उनले मधेस आन्दोलनको उपलब्धिलाई संस्थागत गर्न भूमिका खेल्ने बताउँदै लुम्विनी प्रदेशलाई कानुनी मैत्री बनाउने कानुन निर्माणमा जोड रहने बताए । ‘निर्माण भएका कानुनलाई कार्यान्वयन र आवश्यक कानुन निर्माणमा मेरो पहिलो कदम हुने छ,’ उनले भने ।
उनले गलत गर्नेलाई कानुनी दायरामा ल्याउन सघाउने बताउँदै कानुन उलंघन गर्नेको निगरानी र खवर गर्न नेता, कार्यकर्तालाई निर्देशन दिए । ‘हाम्रो पार्टी जसपा कहिलै गल्ती गर्दैन । गल्ती गर्नेलाई पनि छोड्दैन । प्रहरी, प्रशासनमा हुने ढिलासुस्ती भए तत्काल खवर गर्नुस । म त्यसको निराकरण गर्न तत्पर रहने छु,’ उनले भने ।
पार्टी निर्माणमा जुट्न आग्रह गर्दै मन्त्री अग्रवालले हरेक शनिवार दुई वटा वडामा पुग्ने प्रतिवद्धता समेत जनाए । उनले पार्टीका नेता, कार्यकर्ताको हरेक सुख, दुखमा साथ दिने स्पष्ट पार्दै प्रशासन, प्रहरी र अन्य सरकारी निकायबाट जनताले दुख पाए त्यसको खवरदारी गर्ने बताए । ‘कुनै पनि सरकारी कार्यालय तपाईहरुलाई दुख दिए मलाई खवर गर्नुस, म दुख दिने सरकारी कार्यालयलाई ठेगान लगाउने छु,’ मन्त्री अग्रवालले भने, ‘एक महिनामा आठ वटा वडा घुमेर म जनताको समस्या र आवश्यक विकासको लागि वजेट विनियोजन गर्ने छु ।
उनले आफ्नो मन्त्रालय बाहेक अन्य मन्त्रालयले प्रदान गर्ने सेवा, सुविधाको बारेमा समेत पहल गर्ने जिकिर गरे । ‘जुन जुन मन्त्रालयमा तपाईहरुको काम पर्छ । विकासका योजना बनाएर मलाई दिनुस । म त्यसको लागि वजेटको ब्यवस्था गर्ने छु,’ उनले भने, ‘तपाईहरुको काम भएन भने मलाई भन्नु होला । त्यसको जिम्मेवारी मैले लिने छु ।’
Discussion about this post