बाँके पुस २२ गते ।
बाक्लो हुस्सुले सवारी दुर्घटना हुने खतरालाई मध्यनजर गरि बाँके ट्राफिक प्रहरीले सचेतना अभियान संचालन गरेको छ । बाक्लो हुस्सुले विपरित दिशाबाट आएको सवारी साधन, सडकमा रहेका पशु चौपाया र मानिस नदेखिने भएकोले सवारी साधन चलाउँदा अपनाउनु पर्ने सावधानीका बारेमा सचेतना जगाउन अभियान थालिएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक पुष्करराज पन्तले बताए ।
उनले जिल्ला ट्राफिक प्रहरी कार्यालय र मातहतका अस्थायी ट्राफिक पोष्टले पूर्व–पश्चिम राजमार्ग र बाँकेका सहायक सडकमा सचेतना अभियान संचालन गरिएको बताए । ‘सवारी दुर्घटना हुने ठाउँको पहिचान गरि पूर्व–पश्चिम राजमार्ग र अन्य सहायक सडकमा ट्राफिक प्रहरी परिचालन गरि सचेतना अभियानसँगै चेकजाँच तीव्र पारिएको छ,’ उनले भने ।
ट्राफिक प्रहरीले जिल्लाका बिभिन्न सडक खण्डमा चल्ने सवारी साधनका चालक, सह–चालक, साइकल यात्री, बिद्यार्थी र सर्बसाधारणलाई ट्राफिक नियम, लेन अनुशासन, ओभरटेक गर्ने तरिकाको बारेमा जानकारी दिइदै आएको उनले बताए । ‘चालक, सह–चालक, विद्यार्थी, साइकल यात्री र पैदल यात्रीलाई भेला गराई ट्राफिक नियमको बारेमा सामुहिक रुपमा जानकारी गराउँछौँ,’ उनले भने ।
ट्राफिक प्रहरीले सवारी दुर्घटना न्यूनिकरण गर्न नेपालगन्ज, कोहलपुर लगायत सहरका सर्वसाधारणलाई जेब्रा क्रसिङ र ट्राफिक लाइटको बारेमा समेत सचेतना जगाउँदै आएको छ । उनले भने, ‘नेपालगन्जमा ट्राफिक लाइट नयाँ हो । धेरै सवारी चालकलाई यसको जानकारी नभएकोले सर्वसाधारण र सवारी चालकलाई ट्राफिक नियमको बारेमा जानकारी गराउन आवश्यक ठान्यौँ र अभियान संचालन गर्यौँ ।’
सवारी साधनको गती जाँच्न राडर गनको समेत प्रयोग गरिएको प्रहरी निरीक्षक पन्तले बताए । उनले अत्यधिक गतिमा संचालन भइरहेका सवारी साधनको गति मापन गर्न रार्डर गन प्रयोग गरिएको बताए । ‘अत्यधिक गतिमा संचालन भइरहेका सवारी साधनलाई पहिलो पटक सम्झाई बुझाई गर्ने र त्यसपछि पनि सुधार नगरे कारवाही गर्छौ,’ उनले भने ।
छिटो पुग्ने नाममा सवारी साधन तीब्र गतिमा चलाउँदा सवारी दुर्घटना हुने बताउँदै उनले आफ्नो सुरक्षा आफैले गर्दा राम्रो हुने बताए । ट्राफिक प्रहरीले ट्राफिक नियमको बारेमा जानकारी दिनेमात्र हो । सवारी साधन कसरी चलाउँदा आफू सुरक्षित भइन्छ भन्ने सवारी चालक आफैले सावधानी अपनाउनु पर्छ,’ उनले भने ।
Discussion about this post