बाँके माघ ३ गते ।
टाढाबाट उपचारका लागि आउँदा ज्यान गुमाएका र किरिया गर्ने ठाउँ अभाव भएकाहरूले आफन्तको अन्तिम संस्कार राम्रोसँग पूरा गर्न पाउन् भन्ने उद्देश्यले नेपालगन्जमा किरियापुत्री घर निर्माण भइरहेको छ । नेपालगन्जका समाजसेवी एवम् प्रसिद्ध स्वास्थ्यकर्मी सेमराज शाक्यको नेतृत्वमा गठन भएको किरियापुत्री घर निर्माण समितिको प्रयासले नेपालगन्ज उपमहानगरपालिका –४ बसपार्कनजिक शिव–पार्वती मन्दिरको जमिनमा निर्माण भइरहेको दुईतले किरियापुत्री घरको निर्माण अन्तिम चरणमा पुगेको छ ।
नेपालगन्ज गगनगन्ज माइती भई काठमाडौँ निवासी समाजसेवी माधवी शाहले दस लाख रुपियाँ प्रदान गरेपछि निर्माण शुरु भएको सो घरको निर्माणमा अन्य विभिन्न समाजसेवीले सहयोग गर्दा अहिले निर्माण अन्तिम चरणमा पुगेको समितिका अध्यक्ष सेम शाक्यले बताए । उनका अनुसार एक पटकमा दुईवटा परिवारले आफन्तको अन्तिम संस्कार पूरा गर्न सक्नेगरी संरचना तयार गरिएको छ । भुइँतला र दोस्रो तलामा तीन–तीनवटा कोठा र दुई–दुईवटा अट्याच बाथरुमसहितका कक्षहरू बनाइएको छ ।
जहाँ प्रत्येक तलामा सामूहिक रूपमा बसेर मन्त्रपाठ सुन्ने, आफन्त भेटघाट गर्नेलगायतका प्रयोजनका लागि एउटा कक्ष, महिला र पुरुष सदस्य बस्नका लागि अट्याच बाथरुमसहितको अलग–अलग दुईवटा कक्ष र सानो भण्डार कक्ष निर्माण गरिएको छ । भवनले नेपालगन्जमा आएर डेरा गरी बस्ने, घरमा पर्याप्त ठाउँ नभएका र किरिया गर्ने ठाउँको अभाव भोगिरहेका कसैले पनि भौँतारिनुपर्ने अवस्थाको अन्त्य गर्ने समितिका सचिव वसन्त लामिछानेको भनाइ छ ।
सबै संरचना बनाउन १ करोड १० लाखभन्दा बढी लगानी लाग्ने अनुमान गरिएको र ८० लाखभन्दा बढी खर्च भइसकेको भवन निर्माणको काम पनि नागरिकहस्तरबाट सङ्कलित रकमबाट भइरहेको सचिव लामिछानेले बताए । मन्दिरबाट प्राप्त दुई कठ्ठा जमिनमा निर्माण भइरहेको भवनका लागि नेपालगन्ज उपमहनगरपालिकाले ११ लाख बजेट दिने वाचा गरेकोमा ६ लाख भुक्तानी भएको र ५ लाख बाँकी रहेको जनाइएको छ ।
नेपालगन्जजस्तो सहरमा बाहिरबाट आएर बस्ने मानिसहरू अत्यधिक भएको, स्वास्थ्य उपचारको प्रमुख केन्द्र भएकाले अन्तिम संस्कार गर्ने घरको आवश्यकता अत्यधिक महसुस गरिएको अधिकांशको भनाइ छ । सोही आवश्यकतालाई पूरा गर्न यो भवन निर्माण गरिएको समाजसेवी माधवी शाहले बताए । समितिका अध्यक्ष शाक्यले अब डेकोरेसन, कोठाहरूमा एसीसहितको व्यवस्था गर्ने, बाउन्ड्री वाल बनाउने लगायतका कामहरू बाँकी छ । त्यसका लागि पनि जनस्तरबाटै सहयोग मिल्ने अपेक्षा गरिएको उनले बताए ।
Discussion about this post