अछाम माघ १४ गते ।
अछाममा शुक्रबारदेखि हराएका दुई किशोरी मृत घटना शंकास्पद भन्दै प्रहरीले अनुसन्धान अघि बढाएको छ । ढकारी गाउँपालिका–८ का कमल खड्काकी छोरी ईश्वरी खड्का र सोही ठाउँका उदय खड्काकी छोरी सरस्वती खड्का शुक्रबारदेखि हराएका थिए । उनीहरू दुवै जना बाख्रा चराउन भन्दै वडा नम्बर १ को जंगल गएका थिए ।
जंगलबाट नफर्किएपछि परिवारले शनिबार साँझ ६ः४० बजे प्रहरीलाई खबर गरेका थिए । त्यसपछि राति नै खोजतलासका लागि जंगल गएको प्रहरीले उनीहरूको शव फेला पारेका अछामका डीएसपी इश्वरीप्रसाद भण्डारीले बताए । उनीहरूको शव भीरमा भेटिएको भण्डारीको भनाइ छ ।
शव भेटिएपछि शनिबार राति नै बाँकेको कोहलपुरबाट प्रहरीको तालिम प्राप्त कुकुर र फरेन्सिक विज्ञसहितको टोली लगेर अनुसन्धान सुरु गरिएको डीएसपी भण्डारीले बताए । आइतबार बिहान अछामका प्रमुख जिल्ला अधिकारी, डीएसपी भण्डारी, फरेन्सिक विज्ञ र कुकुरसहितको टोलीले घटनास्थल पुगेर अनुसन्धान सुरु गरेको छ ।
घटनास्थल मुचुल्का गरेर अहिले शव जंगलबाट निकालेर पोस्टमार्टमका लागि पठाउने तयारी गरिएको प्रहरीले जनाएको छ । मृतक दुवै किशोरीको टाउकामा चोट लागेको छ । ‘भीरबाट खसेको ढुंगाले टाउकामा चोट लागेको वा अन्य कारणबाट चोट लागेको हो भन्ने यकिन हुन बाँकी नै छ ।
यद्यपि दुवै किशोरीको टाउकामा एकै प्रकृतिको चोट रहेकाले घटना शंकास्पद जस्तो पनि देखिन्छ,’ डीएसपी भण्डारीले भने । उनीहरूको साथमा भएको मोबाइल समेत घटनास्थलमै भेटिएको छ । मृतक किशोरी १४ र १५ वर्ष उमेरहका रहेको परिवारले बताएका छन् ।
Discussion about this post