दैलेख कार्तिक २९ गते । दैलेखको नागरिक समाजले जिल्लाका स्थानीय सरकार र सरकारी सवारी साधन तथा सार्वजनिक सम्पतिको सदुपयोगमा ध्यान दिन स्थानीय प्रशासनको ध्यानाकर्षण गराएका छन् ।
नागरिक समाज संस्थाहरुको संयुक्त टोलीले आज प्रमुख जिल्ला अधिकारी युवराज कटेललाई भेटेर ध्यानाकर्षणपत्र बुझाएका छन् ।
सरकारी सवारी साधन जनप्रतिनिधि र अधिकारीहरुले व्यक्तिगत काममा प्रयोग गर्न नपाउने, जिल्लामा गरिने सबै कार्यक्रमहरुमा बिनियोजित बजेट जानकारी गराएर मात्र सुरु गर्नुपर्ने र निर्माणाधीन विकास आयोजनाहरुको लागत, समय र अपेक्षित प्रतिफल सबैले देख्नेगरी सार्वजनिक सूचनापाटी राखिनुपर्ने माग राखिएको छ ।
ध्यानाकर्षणपत्र बुझेपछि प्रमुख जिल्ला अधिकारी कटेलले १५ दिनभित्र परिणाम निस्कने गरी काम गर्ने प्रतिवद्धता जनाउनुभयो ।
नागरिक समाजका अगुवा अधिवक्ता खड्गबहादुर सिजापतिले सार्वजनिक सम्पतिको दुरुपयोग बढ्न थालेपछि सुधारको माग गर्दै प्रशासनलाई गुहार्नु परेको बताउनुभयो ।
प्रमुख जिल्ला अधिकारी कटेललाई बुझाइएको ध्यानाकर्षणपत्रमा नागरिक समाजका संयोजक अधिवक्ता सिजापति, नेपाल पत्रकार महासंघका उपाध्यक्ष कृष्ण देवकोटा, महिला सशक्तिकरण मञ्चका डिलकुमारी चन्द र गैरसरकारी संस्था महासंघका अध्यक्ष महारुप खत्रीले पनि दस्तखत गर्नुभएको छ ।
दैलेखका ११ वटै स्थानीय तहहरुले सरकारी गाडी र मोटरसाइकलहरु पनि शनिवार र सार्वजनिक विदाको दिन पनि बिना अनुमति चलाएको, दुरुपयोगको नियतले सेतोमा हुनुपर्ने गाडी रातो नम्वर प्लेटमा सञ्चालन गरिरहेको सिकायत आएपछि नागरिक समाजले यस्तो ध्यानाकर्षण गराएको छ ।
Discussion about this post