दाङ जेठ १ गते ।
लुम्बिनी प्रदेश सभाको छैटौँ अधिवेशनको दोस्रो बैठक आज बस्दैछ । दोस्रो बैठक आज दिउँसो १ बजे बस्नेछ ।पहिलो बैठकमा प्रदेश सभा सदस्यहरूले सरकारको नीति तथा कार्यक्रम र बजेटको विषयमा चासो र चिन्ता व्यक्त गरेका छन्।
प्रदेश सरकारले विगतमा नीति कार्यक्रम राम्रो ल्याए पनि बजेट जनआकांक्षा पूरा गर्न नसक्ने खालको हुने गरेको भन्दै यस अधिवेशनबाट त्यसलाई सच्याएर लैजानुपर्ने सुझाव दिइएको छ । सरकारले प्रत्येक वर्ष घाटा बजेट ल्याउने गरेको, जसका कारण दायित्व बढ्दै गएको र स्रोत खुम्चिँदै गएकोप्रति सदस्यहरूले चिन्ता व्यक्त गरेका छन्। त्यसैले आर्थिक कार्यविधि तथा उत्तरदायित्व ऐनको आधारमा यथार्थमा आधारित बजेट ल्याउनुपर्ने सुझाव दिइएको हो ।
नेकपा एमालेका प्रमुख सचेतक तुलसीप्रसाद चौधरीले प्रदेश सरकारले आगामी वर्षको नीति कार्यक्रम र बजेट लुम्बिनीको यथार्थ धरातलमा उभिएर ल्याउने प्रयास गरिरहेको बताए । सरकार त्यस दिशामा अघि बढ्न खोजेकाले सबैले सहयोग गर्नु जरुरी रहेको उनले बताए। अहिलेसम्म प्रदेश सभामा संलग्न धेरै अनुभवलाई साझा सम्पत्ति मानी अघि बढ्नुपर्ने धारणा व्यक्त गरे । नेपाली कांग्रेसकी प्रमुख सचेतक जमुना ढकालले बजेटको आकार बढाउनुको सट्टा कार्यान्वयनमुखी बनाउनुपर्ने सुझाव दिइन् ।
त्यस्तै माओवादी केन्द्रका प्रमुख सचेतक इन्द्रजित थारुले सरकार नीति कार्यक्रम तयार गर्नु पूर्व कम्तीमा पनि मध्यम कालीन खर्च संरचनाको अनुमान गर्नुपर्ने भए तापनि त्यो नगरी अघि बढेको आरोप लगाए । यदि बजेट यथार्थमा आधारित भएर ल्याउन सकिएन भने पुनः दायित्व बढ्दै जाने र स्रोत घट्दै जाने स्थिति सिर्जना हुनेछ ।’
सरकारको तयारी हेर्दा पुनः घाटा बजेटकै दिशामा सरकार अघि बढिरहेको आभास भएको उनले बताए । बैठकमा जसपाका भण्डारीलाल अहिर, जनमत पार्टीका चन्द्र केश गुप्ता, जसपा नेपालका सन्तोषकुमार पाण्डे, राप्रपाकी मिनाकुमारी श्रेष्ठ लगायतले शुभकामना व्यक्त गरेका थिए ।
Discussion about this post