बाँके जेठ १२ गते
नेपालगन्ज उपमहानगरपालिकाले किसानहरुलाई अनुदानमा धानको बीउ वितरण गर्ने भएको छ । त्यसका लागि १५ हजार किलो धानको वीउ उपमहानगरले किसानलाई वितरण गर्न लागेको नगर उपप्रमुख कमरुद्दिन राईले जानकारी दिए ।
उनका अनुसार किसानको माग र आवश्यकतालाई मध्यनजर गरेर १५ हजार किलो धानको वीउ वितरण गर्न लागिएको हो ।
माग धेरै भएपनि उपमहानगरको सीमित बजेटका कारण योपटक १५ हजार किलोमात्रै खरिद गरेर वितरण गर्न लागिएको उनले बताए । आगामी वर्ष भने नीतिगत व्यवस्था गरेर किसानलाई चाहिने जति धानको बीउ उपलब्ध गराइने उनले विश्वास दिलाए ।
राम धान, राधा चार र श्यामा मन्सुली गरी तीन जातको धानको बीउ किसानलाई वितरण गर्न लागिएको छ ।
बाँकेमा यिनै तीन जातका धानको खेती किसानहरुले बढी गर्ने गरेका छन् । किसानहरुले बजार मूल्य भन्दा कम्तिमा ५० प्रतिशत सहुलियतमा धानको वीउ प्राप्त गर्ने पनि नगर उपप्रमुख राईले जानकारी दिए ।
किसानलाई छिटोछरितो धानको वीउ उपलब्ध गराउने गरी पालिकाले निर्णय गर्ने पनि उनले जानकारी दिए ।
Discussion about this post