गुल्मी असार ५ गते ।
गुल्मीमा वडाबाटै अनलाइन नागरिकता सिफारिस हुँदा सेवाग्राही र कर्मचारी दुवैलाई सहजता भएको छ । पहिले वडाले सिफारिस गरेको अनुसूची फारम बोकेर जिल्ला प्रशासन आउँदा कागजपत्र नपुगेर समस्या झेल्दै आएका सेवाग्राहीहरुले अव उक्त समस्या झेल्न नपर्ने जिल्ला प्रशासन कार्यालय गुल्मीले जनाएको छ ।
प्रशासन कार्यालयका सूचना अधिकारी हरिप्रसाद गैरेका अनुसार जिल्लाका दुई वटा नगर र १० वटा गाउँपालिका गरी १२ स्थानीय तहका सबै वडाबाट अनलाइन नागरिकता सिफारिस हुने गरेको बताए । अहिले सिसिआइएमएस (केन्द्रीय नागरिकता ब्यवस्थापन प्रर्णली)मा आधारित अनलाइन नागरिकता सिफारिस हुने गरेको उनले बताए । नागरिकता प्राप्तिका लागि आवश्यक पर्ने सबै कागजपत्रहरु स्क्यान गरेर सफट्वेयरमार्फत पठाउँदा विश्वासिलो हुनुका साथै दीर्घकालीनसमेत हुने गरेको गैरेले बताए ।
जसका कारण सेवाग्राहीहरुलाई कागजपत्र पुगेन भनेर फिर्ता हुनुपर्ने झन्झट नहुनुका साथै कर्मचारीहरुले पनि सबै कागजपत्र स्क्यान गर्नुपर्ने झन्झटबाट मुक्त भएको उनले बताए । केही अपुग भएमा वडाले सफटवेयरमार्फत नै अपडेट गर्न सक्ने भएकाले सेवाग्राही फिर्ता हुनुपर्ने छैन । पछिल्लो समयमा बढ्दो प्रविधिको उच्चत्तम प्रयोगका कारण सेवाग्राहीका साथै कर्मचारीहरुको पनि समय बचत हुनुका साथै सहज रुपमा सेवा प्रवाहमा थप टेवा पुग्ने उनले दाबी गरे ।
यसले गर्दा कम कर्मचारीले पनि सहज रुपमा धेरै काम गर्न सक्ने जिल्ला प्रशासन कार्यालय गुल्मीले जनाएको छ । पहिले दैनिक ८० नागरिकता दिँदै आएकोमा अहिले १५० सम्म नागरिकता प्रदान गर्न सकिने अवस्थामा भएको गैरेले बताए । सफटवेयरमार्फत अनलाइन सिफारिस हुँदा अन्य समयमा पनि आवश्यक पर्ने कागजपत्र सुरक्षित रहनुका साथै बिचमा कसैले बदमासी गर्न नसक्ने गैरेले बताए ।
वडाले सिफारिस गरेको अनलाइन कोडमार्फत सबै स्क्यान डकुमेन्ट हुने हुँदा नागरिकता प्रिन्ट गर्नमा समय नलाग्ने नागरिकता फाँटकी खरिदार लक्ष्मी बम्रेलले बताए । जसले गर्दा आफूहरुको पनि समय बचत हुने र सेवाग्राहीहरुले पनि छिटो छरितो रुपमा सेवा पाउन सक्ने उनले बताए ।
Discussion about this post