बाँके असार १६ गते ।
खुलासीमानाका कारण भारतबाट भित्र्याइएको ठूलो परिमाणको मोवाइल फोनका डिस्प्ले सशस्त्र प्रहरीले बरामद गरेको छ ।
विओपी जयसपुरबाट सशस्त्र प्रहरी निरीक्षक आवेश पुनको कमाण्डमा खटिएको गस्ती टोलीले भारतबाट अवैध रुपमा भन्सार छलि भित्र्याइएको मोवाइल डिस्प्ले बरामद गरेको सशस्त्र प्रहरी बल नम्बर ३० हेडक्वार्टर बागेश्वरी बाँकेका गणपति प्रहरी उपरीक्षक शोभाकान्त खनालले जानकारी दिए ।
सशस्त्र प्रहरीको टोलीले नेपालगन्ज उपमहानगरपालिका वडा नं. ५ फुलटेक्रा नजिकैबाट ने १ ह १३०९ नम्बरको ई–रिक्सालाई नियन्त्रणमा लिँदै उक्त सामान बरामद गरेको हो ।
ई–रिक्साको डिगीमा लुकाएर राखिएका विभिन्न कम्पनीका मोवाइल फोनका डिस्प्लेहरु फेला परेको प्रहरी उपरीक्षक खनालले बताए । गस्ती टोलीलाई देखेपछि ई–रिक्सा चालक भने फरार भएका थिए ।
बरामद गरिएका मोवाइल डिस्प्लेहरु १३ लाख ८० हजार मुल्य बराबरको रहेको पनि उनले बताए । सशस्त्र प्रहरीले ई–रिक्सालाई समेत नियन्त्रणमा लिएको छ । बरामद गरिएका सम्पूर्ण सामग्रीहरु र ई–रिक्सा आवश्यक कारवाहीका लागि नेपालगन्ज भन्सार कार्यालयमा बुझाइएको छ ।
सीमा क्षेत्रमा अवैध तस्करी र चोरी पैठारी नियन्त्रणका लागि चेकजाँचलाई कडाइ पारिएको प्रहरी उपरीक्षक खनालले बताए ।
Discussion about this post