बाँके असार २२ गते ।
शान्ति र सद्भावको सन्देश दिँदै इस्लाम धर्मावलम्बीले आज ताजिया बिसर्जन गर्दै छन् । १० दिनसम्म मनाउने पवित्र पर्व मोहर्रमले देशमा शान्ति र सद्भाव एवं भाइचारा कायमै रहोस भन्ने कामना सहित आज ताजिया बिसर्जन गर्न लागेको मोहर्रम व्यवस्थापन समिति धमबोझिका अध्यक्ष मेराज अहमद हल्वाई (हिमालय) ले बताए ।
दस दिनसम्म निरन्तर रातभरी विभिन्न जुलुस, महतम र मिलान गरेर मनाइएको सो पर्वको अन्तिम दिन आइतवार विभिन्न स्थानबाट ताजियाका साथ निस्कने जुलुसले नगर परिक्रमा गरेर स्थानीय कर्बलामा पुगेर ताजिया विसर्जन गर्ने कार्यक्रम रहेको उनले बताए । ताजिया विसर्जन जुलुसमा सबै धर्म, सम्प्रदायका सर्वसाधारणको सहभागिता रहने उनको भनाई छ ।
मोहर्रम पर्व सबै धर्मको साझा भएको नेपालगञ्ज फुल्टेक्राका प्रदिप शाहले बताए । उनले मोहर्रम शान्तिको प्रतिक भएको बताउँदै यसलाई अझ प्रभावकारी बनाउनु पर्ने बताए ।
मोहर्रमको नवौं दिन शनिबार राति नेपालगन्जको घर घरमा ताजिया राखेर झिलिमिली पारी बजारलाई नै सिँगारिएको थियो । रातभरि स्थानीयले जाग्राम बसेर ताजियाको हेरचाह गरेका थिए । सर्वसाधारणले भने सहरका विभिन्न भागमा पुगेर रातभरि ताजियाको दर्शन र सहरको झिलिमिली अवलोकन गरेका थिए ।
इराकको कर्बलामा शहीद हुनुभएका इस्लाम धर्मका अन्तिम पैगम्बर हजरत मोहम्मदका नातिहरु हजरत इमाम हुुसैन र हजरत इमाम हसनको सम्झनामा मुस्लिम धर्मावलम्बीले १० दिनसम्म विविध कार्यक्रम गरी मोहर्रम मनाउँदै आएका छन् ।
उनीहरुकै शहादतको सम्झनामा अरबी क्यालेण्डर अनुसार मोहर्रम महिनाको पहिलो दसदिन विविध कार्यक्रम गरेर मनाइने यो पर्वमा हुसैन र हसनको सम्झनामा ताजिया राखिने परम्परा रहेको अध्यक्ष हिमालयले बताए ।
’कागज र काठबाट बनाइएका ताजियालाई नौ तारिखमा आ–आफ्नो घर अगाडि स्थापित गरेर रातभरि जाग्राम बस्ने गरिन्छ । ती ताजियालाई राख्नु अघि भाकल गर्ने र आफ्नो मनोकामना पूरा भएपछि ताजिया राख्ने गरिन्छ,’ उनले भने ।
मोहर्रमलाई लक्षित गरि नेपालगन्जको सुरक्षा व्यवस्था कडा पारिएको छ।
मोहर्रम पर्वलाई शान्तिपूर्ण रुपमा सम्पन्न गर्न नेपालगन्जमा सुरक्षा व्यवस्था कडा पारिएको जिल्ला प्रहरी कार्यालय बाँकेका प्रमुख एसपी रामप्रसाद घर्तीमगरले बताए । मोहरर्रम पर्वलाई सम्पन्न गर्न विशेष सुरक्षा योजना बनाएर प्रहरी र सशस्त्र प्रहरीका गरेर करिब सातसय भन्दाबढि सुरक्षाकर्मी परिचालन गरि ड्रोनबाट निगरानी बढाइएको छ,’ उनले भने, ’संवेदनशील स्थलहरुको पहिचान गरी ती ठाउँहरुमा सुरक्षाकर्मीको बाक्लो उपस्थितिसँगै ड्रोनबाट निगरानी भइरहेको छ ।’
मोहरर्रम पर्वलाई सभ्य, भब्य र शान्तिपूर्ण बनाउन नेपालगन्जमा कडा सुरक्षा व्यवस्था मिलाइएको वडा प्रहरी कार्यालयका इन्चार्ज प्रहरी निरीक्षक अरुण बमले बताए ।
मोहर्रमलाई लक्षित गरी प्रहरी र सशस्त्र प्रहरीको संयुक्त गस्ती समेत बढाइएको जिल्ला प्रहरी कार्यालय बाँकेका प्रवक्ता प्रहरी नायब उपरीक्षक दीपक पातलीले बताए ।
बाँकेका प्रमुख जिल्ला अधिकारी धर्मराज जोशीले मोहर्रम पर्वलाई सभ्य, भब्य र शान्तिपूर्ण बनाउन सहयोग गर्ने सबैलाई धन्यवाद दिएका छन्।
मोहर्रमको ताजिया सेलाउन जाने क्रममा त्रिबेणी मोडमा आयोजित कार्यक्रमलाई सम्बोधन गर्दै उनले सबै जातजातिको संस्कार र पर्वको सम्मानले मात्र सद्भाव बढ्ने बताउँदै उनले नेपालगञ्ज साचिकै सद्भावको सहर भएको धारणा राखे । ’नेपालगंजमा बसोवास गर्नेहरुले एक अर्काको धर्म प्रति गरेको सम्मानले सद्भावको सहर बनाउन सहयोग गरेको छ,’ उनले भने ।
ताजिया बिसर्जन गर्न जाने क्रममा सर्वसाधारणले घरको छतबाट अवलोकन गरेका थिए भने सुरक्षाकर्मीले समेत छतमा बसेर सुरक्षा दिएका थिए ।
Discussion about this post