बाँके असार २२ गते ।
बाँकेको बैजनाथ गाउँपालिकामा छोराले बाबुको हत्या गरेको प्रहरीले जनाएको छ । बैजनाथ गाउँपालिका–२ मकैबारी निवासी ६० वर्षीय टोपबहादुर रोका क्षेत्रीको शनिबार राति हत्या भएको इलाका प्रहरी कार्यालय कोहलपुरले जनाएको छ ।
इलाका प्रहरी कार्यालय कोहलपुरका सूचना अधिकारी प्रहरी निरीक्षक हरि भट्टराईका अनुसार शनिबार कान्छा छोरा भविलाल रोकाले धारिलो हतियार प्रयोग गरी बुबा टोपबहादुरको हत्या गरेका हुन् ।
घरमा परिवारका अन्य सदस्यहरु नभएको बेला भविलालले बाबुको हत्या गरेको प्रारम्भिक जानकारी आएको बताउँदै इलका प्रहरी कार्यालय कोहलपुरका सूचना अधिकारी भट्टराईले घटनाबारे अनुसन्धान सुरु गरिएको बताए। उनले बाबुको हत्या गरेर भविलाल फरार रहेको जनाउँदै प्रहरीले उनको खोजी भइरहेको जानकारी दिए । यद्यपि हत्या किन र कसरी भयो भन्नेबारे अहिलेसम्म खुल्न नसकेको उनले बताए।
छिमेकीहरुका अनुसार भविलाल लागुऔषध सेवन गर्ने भएकाले सो घटना भएको हुन सक्ने अनुमान गरिएको छ । सो घटनाबारे प्रहरीले अनुसन्धान अगाडि बढाएको बताउँदै प्रहरीको तालिमप्राप्त कुकुरको सहायताले फरार भविलालको खोजी गरिरहेको इलाका प्रहरी कार्यालय कोहलपुरले जनाएको छ ।
Discussion about this post