लुम्बिनी प्रदेशमा ५२ प्रतिशत धान रोपाइँ

लुम्बिनी असार २५ गते ।
लुम्बिनी प्रदेशको मुख्य बालीमा पर्ने धान ५२ प्रतिशत रोपाइँ सकिएको छ । असार तेस्रो सातासम्म ५२ प्रतिशत रोपाइँ भएको कृषि भूमि व्यवस्था तथा सहकारी मन्त्रालय अन्तर्गत कृषि विकास निर्देशनालयले जनाएको छ ।

निर्देशनालयका अनुसार धान रोपाइँ हुने कुल ३ लाख २ हजार ९३९ हेक्टर क्षेत्रफल मध्ये अहिलेसम्म १ लाख ५७ हजार ८५७ हेक्टर क्षेत्रफलमा रोपाइँ भएको निर्देशनालयले जनाएको छ । प्रदेशमा सबैभन्दा धेरै प्यूठानमा ८२ प्रतिशत रोपाइँ सकिएको छ । तराईका जिल्लामध्ये सबैभन्दा धेरै पश्चिम नवलपरासीमा धान रोपाइँ ९० प्रतिशत सम्पन्न भएको छ ।

२० हजार ४८० हेक्टर क्षेत्रमध्ये १८ हजार ४३२ हेक्टर क्षेत्रफलमा रोपाइँ सम्पन्न भइसकेको निर्देशनालयले जनाएको छ । पहाडी जिल्लामा सबैभन्दा धेरै प्यूठानमा ८६ प्रतिशत सम्पन्न भएको छ । ६ हजार ५२५ हेक्टर क्षेत्रफलमध्ये ५ हजार ६१२ हेक्टर क्षेत्रफलमा रोपाइँ भएको छ । कपिलवस्तुमा ६५ हजार ८७१ हेक्टर क्षेत्रफलमध्ये २३ प्रतिशत क्षेत्रफलमा धान रोपाइँ सकिएको छ ।

यस वर्ष कुल क्षेत्रफलको १५ हजार १५० हेक्टरमा मात्र रोपाइँ भएको निर्देशनालयले जनाएको छ । रुकुम पूर्वमा धान खेती हुने ३ सय ५४ हेक्टर क्षेत्रफलमध्ये ३ सय १ हेक्टर क्षेत्रफलमा रोपाइँ सम्पन्न भएको छ । जुन कुल धान खेती हुने क्षेत्रफलको ८५ प्रतिशत हो । रोल्पामा ४ हजार ५४७ हेक्टर मध्य ४ हजार १ हेक्टर क्षेत्रफलमा अर्थात् ८८ प्रतिशतमा रोपाइँ सम्पन्न भएको छ ।