बर्दिया असार २५ गते ।
बर्दियाको ठाकुरबाबा नगरपालिकाको पर्यटकीय क्षेत्र ठाकुरद्वारामा निर्माण गर्न थालिएको सडक अलपत्र परेको छ । निर्माण व्यवसायीले समयमा काम नगर्दा ठाकुरबाबा नगरपालिकाको मुख्य पर्यटकीय क्षेत्र वडा नं. ९ का सडक अलपत्र परेका हुन् ।
सडक निर्माण गर्दागर्दै निर्माण व्यवसायीले अलपत्र पारेर छाडेपछि पर्यटकीय क्षेत्र कुरूप बनेको छ । पर्यटक चहलपहल हुने ठाउँमा लामो समयदेखि गिट्टी थुपारेर राखेपछि आवतजावतमा नै समस्या देखिँदै आएको छ । पर्यटन व्यवसायी रामजी थापाले चलनचल्तीको बाटोमा समेत गिट्टी थुपारेर राखेपछि आवतजावत गर्न समस्या भएको बताए । बेस झारेर निर्माण व्यवसायी काम नगरी गायब भएको गुनासो उनको छ ।
पर्यटकीय क्षेत्रमा आवतजावत गर्न सहज होस् भनेर ठाकुरबाबा नगरपालिकाले वडा नं. ९ मा चार वटा प्याकेज बनाई करिब सात किलोमिटर सडक कालोपत्रे गर्न ठेक्का गरेको थियो । तीमध्ये अधिकांश सडक निर्माण व्यवसायीले काम नगरी अलपत्र पारेका छन् । ठाकुरबाबा नगरपालिकाकी उपप्रमुख बिना भट्टराईले निर्माण व्यवसायीले बेस झारेर बाटो हिँड् नै नमिल्ने गरी छोडेपछि नगरपालिकाले आफ्नै साधन परिचालन गरेर सम्याउन समेत बाध्य भएको बताइन् ।
उनले भनिन्े, “निर्माण व्यवसायीले काम नगर्दा नगरपालिकालाई दायित्व थपिएको छ । कतिपय संघीय योजना समयमा सम्पन्न नहुँदा बजेट फ्रिज जाने र दायित्व नगरपालिकामा थोपरिने गरेको छ ।” एक वर्षअगाडि नै निर्माण सकिनुपर्ने सडक हालसम्म पनि निर्माण नगर्दा नगरपालिकाले ठेक्कासमेत तोडेको छ । ठाकुरबाबा नगरपालिकाका प्रमुख प्रशासकीय अधिकृत नारायणप्रसाद ढकालले ठाकुरबाबा नगरपालिकाले ९ नं. वडाका दुई ओटा र ३ नं. वडाको एक गरी तीन ओटा ठेक्का सम्झौता तोडेर कारबाहीको प्रक्रिया अगाडि बढाएको बताए ।
समयमा काम नगरेको भन्दै ठाकुरबाबा नगरपालिका वडा नं. ३ मा रहेको रामदास मार्ग कालोपत्रे गर्ने जिम्मा पाएका निर्माण व्यवसायी तुलसी इन्जिनियरिङ एन्ड कन्स्ट्रक्सन प्रालि काठमाडौँलाई कारबाही प्रक्रिया अगाडि बढाइएको छ । २०७९ चैतसम्म रामदास मार्गको ३५५ मिटर सडक कालोपत्रे गर्नका लागि तुलसी इन्जिनियररिङले २०७८ मङ्सिरमा ठेक्का पाएको थियो तर हालसम्म काम नगर्दा ठेक्का तोडेर कारबाही गर्न बाध्य भएको ढकालले बताए ।
त्यसैगरी नेपाल राष्ट्रिय मावि ठाकुरद्वारादेखि खुसलपटुवासम्मको १८० मिटर सडक र चिट्कैयादेखि बर्दिया राष्ट्रिय निकुञ्जको गेट, हात्तीसार हुँदै मधुवन नगरपालिका जोड्ने ७२३ मिटर गरी दुई ओटा सडक निर्माण गर्न अलपत्र पार्ने अमर कन्स्ट्रक्सन ठाकुरबाबा बर्दियालाई नगरपालिकाले कारबाही गरेको छ ।
नगरप्रमुख तिलकराम लम्सालले २०८१ असारसम्म निर्माण गर्ने गरी सम्झौता भए पनि पटक पटक म्याद थप गर्दासमेत हालसम्म सडक निर्माण नगरेका कारणले सम्झौता तोडेर कारबाही प्रक्रिया अगाडि बढाएको बताए । उनले निर्माण व्यवसायीले काम नगर्दा जनताले दुःख पाएको र नगरपालिकाको दायित्व बढ्दै गएको गुनासो गरे । उनले काम नगर्ने निर्माण व्यवसायीलाई तत्कालै ठेक्का सम्झौता तोडेर अर्को प्रक्रिया सुरु गरिने बताए ।
Discussion about this post