बाँके साउन ५ गते ।
नेपालगन्ज उपमहानगरपालिका १९ आलानगरस्थित ऐलानी जमिनमा विवाद भएको छ । विवादित दुवै पक्षले जमिन आफ्नो भएको दावी गर्दै आएका छन् । जमिन आफ्नो भएको दावी गर्दै आएकी अमृता क्षेत्रीले शनिवार पत्रकारलाई विवादित जमिन देखाउँदै जमिन ऐलानी भए पनि बाबु, बाजेको पालादेखि आफ्नो परिवारले जोतभोग गर्दै आएको जमिन अर्कैले हडप्न खोजेको आरोप लगाइन् ।
आलानगरकी स्थायी बासिन्दा क्षेत्रीले आफ्नो भोगचलनको जग्गा अर्कैले जवरजस्ती जोतभोग गर्न थालेपछि प्रतिवाद गरेको बताइन् । ‘यो जमिन १७ कट्ठा छ । विगत लामो समयदेखि हाम्रो परिवारले जोतभोग गर्दै आएको छ । विदेश जानुअघि स्थानीय भरत गौतमलाई ३ वर्षका लागि एउटा प्लट २० हजार रुपैयाँमा भाडामा दिएकी हुँ । अहिले उक्त जमिन मेरो हो भन्दै जोतभोग गर्न खोज्दै हुनुहुन्छ,’ उनले भनिन् ।
गौतमसँग लिएको रकम फिर्ता गरिसकेको उनले बताइन् । तर, पुरानो सम्झौता देखाउँदै केहि व्यक्तिले धम्कीपूर्ण शैलीमा जग्गा कब्जा गर्न खोजेको उनले आरोप लगाइन् । ‘पैसा लेनदेनको भाकासंगै दिनुपर्ने रकम पनि फिर्ता दिइसकेको छु । जग्गाको कारोबार भएको तीन वर्ष बितिसकेको छ । रकम पनि फिर्ता दिइसकेकी छु । तर अहिले भोजराज शर्मा र अन्य केही व्यक्तिले मलाई ब्ल्याकमेल गर्दै जग्गा अर्कैलाई जोत्न लगाइरहनु भएको छ,’ उनले भनिन् ।
जग्गाको विषयमा अमृताले भरतसँग लेनदेन भएको स्वीकार गरे पनि सो कागजात आफूले हेर्न नपाएको बताइन् । उनले विश्वासकै आधारमा सम्झौता भएको स्पष्ट पारिन् । अहिले प्रयोगमा ल्याइएको कागजमा नाम उल्लेख भएको ब्यक्ति कागज गर्ने बेला जन्मेको थिएन होला । नक्कली कागज बनाएर मलाई फसाउने प्रयास भइरहेको छ,’ अमृताले भनिन् ।
उक्त जग्गा हाल स्थानीय भोजराज शर्माको निगरानीमा अर्कैले जोतभोग गरिरहेका छन् । आफूले चौकीदारको रूपमा काम गरिरहेको र उक्त जमिनमा आफ्नो कुनै व्यक्तिगत स्वार्थ नभएको उनले दाबी गरे । ‘केशव श्रेष्ठले मलाई जमिनको रेखदेख गर्न भन्नु भएको हो । सोही बमोजिम मैले रेखदेखमात्र गरेको हुँ,’ उनले भने ।
तर, स्थानीयले भोजराजको भूमिकामाथि प्रश्न उठाएका छन् । ‘चौकीदारलाई यति ठूला निर्णय गर्ने अधिकार हुँदैन, कतै भोजराज स्वयं संलग्न छन् कि भन्ने आशंका छ,’ एक स्थानीयले भने ।
यता आफूलाई वकिल बताउने केशव श्रेष्ठले यो विषय कानुनी ढंगबाट समाधान हुनुपर्ने बताउँछन् । ‘२० वर्षअघि अमृता क्षेत्रीसँग भरत गौतमको लेनदेन भएको हो । मसँग सबै प्रमाण सुरक्षित छ,’ उनले भने ।
तर अमृताले भने स्पष्ट रूपमा आरोप लगाउँदै आएकी छन् । भोजराज र अन्य केही व्यक्तिको मिलेमतोमा जग्गा कब्जा गर्न खोजिएको उनको आरोप छ ।
Discussion about this post