बाँके साउन ५ गते ।
जिल्ला ट्राफिक प्रहरी कार्यालय बाँकेले गत आर्थिक वर्षमा तीन करोड दुई लाख ६७ हजार ५ सय रुपैयाँ राजस्व संकलन गरेको छ । गत आर्थिक वर्ष ०८१/०८२ को १२ महिनामा ट्राफिक नियम उलंघन गर्ने विभिन्न सवारी साधनबाट उक्त राजस्व संकलन भएको बाँके ट्राफिक प्रमुख पुष्करराज पन्तले जानकारी दिए ।
उनले ८ हजार ४ सय ३९ वटा बस र मिनी बसलाई कारवाही गरि ८६ लाख १७ हजार रुपैयाँ राजस्व संकलन भएको बताए । त्यसैगरी, चार हजार दुई सय ९८ वटा ट्रक र टिप्परबाट ४२ लाख ६२ हजार रुपैयाँ राजस्व संकलन गरेको बताए । उनले एक हजार दुई सय १८ वटा ट्रैक्टरलाई कारवाही गरिएको बताए । उक्त कारवाहीबाट ९ लाख ८४ हजार पाँच सय रुपैयाँ राजस्व संकलन भएको बताए । ‘ट्राफिक नियम उलंघन गर्नेमा सवैभन्दा धेरै मोटरसाइकल छन् । त्यसपछि कारवाहीमा पर्ने बस र मिनी बस भएको तथ्यांक छ,’ उनले भने ।
उनले एक वर्षको अवधिमा ३७ हजार ४ सय ३५ वटा सवारी साधनलाई कारवाही गरिएको बताए । उनका अनुसार, सवैभन्दा धेरै राजस्व बैशाख महिनामा संकलन भएको छ । उक्त महिनामा २९ लाख ७५ हजार ५ सय रुपैयाँ राजस्व संकलन भएको थियो ।
उनले चैत महिनामा २९ लाख ५८ हजार रुपैयाँ राजस्व संकलन भएको बताए । त्यसैगरि, फागुन महिनामा २९ लाख ११ हजार ५ सय रुपैयाँ, माघमा २५ लाख ४५ हजार, असारमा २५ लाख १४ हजार ५ सय र चैत महिनामा २५ लाख १२ हजार ५ सय रुपैयाँ राजस्व संकलन भएको बाँके ट्राफिक प्रमुख प्रहरी निरीक्षक पन्तले जानकारी दिए ।
प्रहरी निरीक्षक पन्तले दिएको जानकारी अनुसार, बाँके ट्राफिकले मंसिर महिनामा २५ लाख १२ हजार, पुसमा २४ लाख ७५ हजार, कात्तिकमा २४ लाख ३१ हजार, असोजमा २४ लाख चार हजार ५ सय रुपैयाँ, साउनमा २१ लाख ४६ हजार र भदौँ महिनामा १८ लाख ८३ हजार रुपैयाँ राजस्व संकलन गरेको छ । ‘अघिल्लो आर्थिक वर्षको भन्दा गत आव ०८१–०८२ मा कारवाहीसँगै राजस्व पनि बढेको छ,’ उनले भने ।
आव ०८१–०८२ को एक वर्षमा सवारी दुर्घटनामा परि ७० जनाले ज्यान गुमाएका छन् । ज्यान गुमाउनेमा ५५ पुरुष, १० महिला, ४ बालक र एक बालिका रहेको जिल्ला ट्राफिक प्रहरी कार्यालय बाँकेले जनाएको छ । एक वर्षमा आठ सय ५२ वटा सवारी साधन दुर्घटना भएकोमा एक सय दुई पुरुष, २० जना महिला, १६ बालक र चार जना बालिका गम्भिर घाइते भएको बाँकेका ट्राफिक प्रहरी प्रमुख पन्तले जानकारी दिए ।
उनले गत आवमा दुर्घटनामा परि सात सय ८४ जना सामान्य घाइते भएको बताउँदै दुर्घटनामा २२ वटा पशु चौपाया मरेको बताए । ‘पशु चौपायासँग ठोकिएर ५ सय ७७ वटा दुर्घटना भएकोमा २२ वटा पशु चौपाया मरेको र सात वटा घाइते भएको अवस्था छ,’ उनले भने ।
Discussion about this post