काठमाडौं साउन ९ गते ।
भारतको नयाँदिल्लीस्थित नेपाली राजदूतावासले कुवेत जान लागेका ४७ नेपाली महिलालाई उद्धार गरी नेपाल फर्काएको छ । गैरकानुनी ढंगले भारतको बाटो हुँदै घरेलु कामदारका रूपमा कुवेत जान लागेका उनीहरूलाई भारत सरकारका सम्बन्धित निकायहरूसँगको सहकार्यमा उद्धार गरी नेपाल फर्काएको हो ।
भारतको इन्दिरा गान्धी अन्तर्राष्ट्रिय विमानस्थल हुँदै साउदी एयरको उडानमार्फत मंगलबार बोर्डिङ पास लिइ कुवेत जाने लागेका थिए । उनीहरूसँग भएको वैदेशिक अध्ययन अनुमति पत्र ९एनओसी० शंकास्पद देखेपछि विमानस्थलको अध्यागमनले राजदूतावाससँग सम्पर्क गरेको थियो ।
सबै एनओसी नक्कली भएको प्रमाणित भएपछि उनीहरूलाई कुवेत जानबाट रोक लगाइएको नयाँदिल्लीस्थित नेपाली राजदूतावासले जनाएको छ । यसअघि,पनि ४७ जनाको समूहलाई शंकास्पद एनओसी बोकेको आधारमा भारतको सोही अन्तर्राष्ट्रिय विमानस्थलबाट बोर्डिङ पास जारी नगरी फर्काइएको थियो । त्यसलगत्तै राजदूतावासका प्रतिनिधिहरू विमानस्थल गई अध्यागमनका अधिकारीहरूसँगको समन्वयमा उनीहरूलाई नेपाल फर्काउने प्रक्रिया अघि बढाइएको थियो ।
भारतको विदेश मन्त्रालयसमेतको सहजीकरणमा उनीहरूसँगै आएका राजदूतावासका प्रतिनिधिहरूको रोहवरमा थप अनुसन्धानका लागि बिहीबार जिल्ला प्रहरी कार्यालया, रूपन्देहीलाई हस्तान्तरण गरिएको दूतावासले जनाएको छ । मानव तस्करहरूको फन्दामा परी गैरकानुनी रूपमा विदेश जाने र विदेशमा गई अलपत्र पर्ने नेपाली नागरिकहरूको संख्या ठूलै छ ।
अतः आफू ठगिन एवं कानुनी झन्झटबाट जोगिन विदेश जानुअघि आफूसँग भएका पासपोर्ट, भिसा, एनओसीलगायत सबै कागजातहरू दुरुस्त भएको यकिन गरेर मात्र यात्रा गर्न दूतावासले अनुरोध गरेको छ ।
Discussion about this post