काठमाडौें, साउन २ गते।
जल तथा मौसम विज्ञान विभागले मनसुनी गतिविधि थप सक्रिय हुने भन्दै आज र भोलिका लागि देशका विभिन्न क्षेत्रमा भारी वर्षाको सम्भावना रहेको जनाएको छ। विभागले सम्भावित जोखिमलाई मध्यनजर गर्दै उच्च सतर्कता अपनाउन सर्वसाधारणलाई आग्रह गरेको छ।
विभागले शनिबार र आइतबार देशभर मनसुनी प्रभाव बढ्ने पूर्वानुमान गर्दै हिमाली र पहाडी भूभागका धेरै स्थान तथा कोशी, बागमती, लुम्बिनी र सुदूरपश्चिम प्रदेशका तराईका थोरै स्थानमा भारीदेखि धेरै भारी वर्षा हुन सक्ने जनाएको छ। यस्तै, मधेस, बागमती र गण्डकी प्रदेशका तराई क्षेत्रका एक–दुई स्थानमा पनि भारी वर्षाको सम्भावना रहेको छ।
विशेष बुलेटिन जारी गर्दै विभागले कोशी, गण्डकी, लुम्बिनी र सुदूरपश्चिम प्रदेशका पहाडी तथा तराई क्षेत्रका केही स्थानमा अति भारी वर्षा हुन सक्ने चेतावनी दिएको छ। साथै, देशका धेरै स्थानमा मेघगर्जन तथा चट्याङसहित मध्यम वर्षाको सम्भावना रहेको विभागले जनाएको छ।
बंगालको खाडीमा विकसित न्यूनचापीय प्रणाली उत्तर–पश्चिम दिशातर्फ सर्ने क्रममा रहेकाले मनसुन थप सक्रिय हुने सम्भावना रहेको विभागको भनाइ छ।
विभागले नदी तथा खोलामा बहाव बढ्न सक्ने, पहाडी क्षेत्रमा पहिरो र तराई क्षेत्रमा डुबानको जोखिम रहने भएकाले आवश्यक सतर्कता अपनाउन सर्वसाधारण तथा सरोकारवाला निकायलाई अनुरोध गरेको छ।
Discussion about this post