बाँके मंसिर ३ गते ।
शौचालयको पहुँचबाट कोही बञ्चित नहोस’ भन्ने मुल नाराका साथ मंगलबार बाँकेमा पनि मनाइएको छ । दिवसको अवसरमा बाँकेको जानकी गाउँपालिकाका बिद्यालयमा सरसफाई कार्यक्रम तथा नेपालगञ्ज उपमहानगरपालिकामा ध्यानाकर्षण पत्र बुझाइएको छ ।
बाँकेको जानकी गाउँपालिका वडा नं.–२ स्थित नेपाल राष्ट्रिय माध्यमिक बिद्यालय जोगागाउँ र वडा नं.–६ गनापुरस्थित नेपाल राष्ट्रिय माध्यमिक बिद्यालय भाटनपुर्वामा बिद्यालय हाताभित्र सरसफाई गरिएको छ भने नेपालगञ्ज उपमहानगरपालिकामा भित्र रहेका सार्वजनिक शौचालयको सरसफाई र प्रभावकारी व्यवस्थापन गर्नुपर्ने माग गर्दै स्थानीय तहको ध्यानाकर्षण गराएको हो ।
बिद्यालयमा रहेको बाल क्लब तथा महिनावारी व्यवस्थापन समूहको नेतृत्व, स्थानीय तहको समन्वय सहकार्यमा प्लान इन्टरनेशनल नेपाल बाँकेको आर्थिक सहयोगमा गेरुवा ग्रामीण जागरण संघ बर्दिया, शाखा कार्यालय बाँकेमार्फत सरसफाई कार्यक्रम गरिएको छ ।
सरसफाई कार्यक्रममा बिश्व शौचालय दिवसको महत्व, हालसम्म बिश्वभरी शौचालयको प्रयोग र अवस्थाबारे जानकारी प्रदान गरिएको थियो भने शौचालय, बिद्यालय हाता र वरीपरिको सरसफाई गरिएको गेरुवाका सुपरभाईजर बिराउन शेषले जानकारी दिनुभयो ।
यस्तै दिवसको अवसरमा नेपालगञ्जस्थित सूचना र मानव अधिकार अनुसन्धान केन्द्रको अगुवाईमा अधिकारकर्मीहरुको एक समुहले सार्वजनिक शौचालयको सुधार माग गर्दै नेपालगञ्ज उपमहानगरपालिकाकी उपमेयर उमा थापा मगरलाई ध्यानाकर्षण पत्र बुझाएको हो ।
ध्यानाकर्षण पत्रमा नेपालगञ्ज नगरभित्रका सार्वजनिक शौचालयहरुको सरसफाई र निःशुल्क व्यवस्था, नगर बसमा जेष्ठ नागरिक, अपाङता भएका, बालबालिका तथा विद्यार्थीका लागि छुट्टै सिट तथा छुटको व्यवस्था गर्नुपर्ने, सार्वजनिक स्थलमा धुम्रपानको अन्त्य गर्नुपर्ने जस्ता विभिन्न मागहरु रहेका छन् ।
शौचालय अनि यसको महत्वलाई सबैसामु उजागर गर्दै हरेक वर्ष नोभेम्बर १९ तारिखमा विश्व शौचालय दिवस मनाउने गरिन्छ । सन् २०३० सम्मको दीर्घकालीन विकास लक्ष्यमा संसारका हरेक मानिसलाई सरसफाईका श्रोत र सुविधाका साथ खेर जाने पानीलाई पूनः प्रयोग गर्ने स्रोत र संरचना पनि सुलभ बनाउने लक्ष्य छ । शौचालयको प्रयोगपछि नछुटाई गर्नुपर्ने पहिलो काम भनेको साबुन पानीले हात धुने र साबुन नभएमा खरानी पानीले धुन चिकित्सकहरुको सुझाव छ । अझै पनि संसारभरि लगभग अढाई करोड मान्छेहरूले शौचालय प्रयोग नगरेको तथ्याङ्क छ ।
Discussion about this post