सुर्खेत भदौ २ गते ।
कर्णाली प्रदेशका पहाडी जिल्लामा घुमन्ते जीवन बिताउँदै आएका लोपोन्मुख राउटे समुदायका लागि कर्णाली प्रदेश सरकारले ‘राउटे कोरिडोर’ बनाउने तयारी गरेको छ । बर्सौंदेखि राउेट बस्दै आएका मुख्य स्थान पहिचान गरेर उनीहरूलाई अस्थायी रूपमै आवास, शिक्षा, स्वास्थ्य, सुरक्षालगायतको सेवा प्रदान गर्न ‘राउटे कोरिडोर’ बनाउन लागिएको हो ।
कर्णाली प्रदेशको सामाजिक विकास मन्त्रालयले चालु आर्थिक वर्षमा राउटे हिँडडुल गर्ने क्षेत्रलाई राउटे कोरिडोर बनाउने उल्लेख गरेको छ । अछामको कालेकाँडा, दैलेख, जाजरकोट, सुर्खेत र सल्यान जिल्लाका नदी तथा खोला किनारमा बढी बस्ने स्थानलाई राउटे कोरिडोर बनाइने छ । सामाजिक विकासमन्त्री घनश्याम भण्डारीले यी स्थानमा राउटे बढी हिँडडुल गर्ने र बस्ने भएकाले राउटे कोरिडोर बनाउने तयारी प्रदेश सरकारले गरेको बताउनुभयो । यी स्थानमा राउटे पालोपालो अस्थायी रूपमा बस्न आउने भएकाले प्रदेश सरकारले अध्ययन गरेर यस वर्षको बजेट तथा कार्यव्रmममा राउटे कोरिडोर बनाउने तयारी गरेको उहाँले जनाउनुभयो ।
उहाँका अनुसार पछिल्लो १० वर्षमा राउटे समुदाय यी जिल्लामा बढी हिँडडुल र बस्ने गरेका छन् । यी स्थानको अध्ययन गरेर उनीहरूको सुरक्षा र जीवनयापनलाई सहज बनाउने उद्देश्यले राउटे कोरिडोर निर्माण गर्न लागिएको उहाँको भनाइ छ । त्यसका लागि प्रदेश सरकारले अहिले राउटे समुदाय बसोबास गरिरहेको स्थानको अध्ययन र राउटे समुदायको प्रोफाइल तयार पारेको छ । सरकारले सामाजिक सुरक्षा भत्ता वितरण गर्दा उनीहरूको जीवनयापनमा सहजता आए पनि दुरुपयोग हुन थालेको छ ।
यसलाई मध्यनजर गर्दै घुमिरहने राउटे समुदायलाई कोरिडोर बनाएर उनीहरूले बनाएका काठका सामग्रीको बजारीकरण गर्ने, कोरिडोर क्षेत्रमा रहेका रुख हटिसकेकाले वृक्षरोपण गर्ने, कन्दमूललगायतका परम्परागत खानेकुरालाई प्राथमिकता दिने र सुरक्षा दिन उद्योग, पर्यटन, वन तथा वातावरण मन्त्रालयसँग समन्वय गरेर काम गर्ने मन्त्री भण्डारीले बताउनुभयो । यसका साथै कोरिडोरमा जहाँ जहाँ बस्छन्, उनीहरूलाई सुरक्षाका लागि अस्थायी बसोबासको पनि व्यवस्था मिलाउन सकिने उहाँको भनाइ छ । यस काममा सम्बन्धित जिल्लाका स्थानीय पालिकाले पनि सहजीकरण गर्नुपर्ने छ ।
Discussion about this post